Një operacion i pazakontë është ndërmarrë në Shtetet e Bashkuara të Amerikës, ku mijëra trungje pemësh j...
POLITIKE
PD: Drejtësia në kolaps, qytetarët presin deri në 12 vite për një vendim gjyqësor
PiranjatPërditësimi i fundit 12 May 2026, 13:40
Drejtuesi i Departamentit të Drejtësisë në PD, Franci Nuri, deklaroi se sistemi i drejtësisë në Shqipëri ndodhet në një krizë të thellë funksionale, duke iu referuar raporteve zyrtare të institucioneve të drejtësisë.
Në një deklaratë për mediat nga selia blu, Nuri u shpreh se, numri i lartë i dosjeve të pazgjidhura dhe vonesat shumëvjeçare po dëmtojnë rëndë besimin e qytetarëve tek shteti dhe ligji.
Nuri akuzoi qeverinë se po promovon propagandë për integrimin europian, ndërsa drejtësia përballet me mungesë kapacitetesh, korrupsion dhe presione politike.
Ai theksoi se pa drejtësi të pavarur dhe funksionale, Shqipëria nuk mund të avancojë drejt Bashkimit Europian.
Deklarata e Franci Nuri, drejtues i Departamentit të Drejtësisë në PD
‘Raportet zyrtare të KLGJ-së, KLP-së, SPAK-ut dhe institucioneve të tjera të drejtësisë po nxjerrin çdo ditë në pah një realitet dramatik: sistemi i drejtësisë në Shqipëri ndodhet në krizën më të rëndë funksionale të dekadave të fundit.
Sot në gjykatat shqiptare rezultojnë afro 150 mijë dosje stok. Vetëm në Gjykatën e Apelit të Juridiksionit të Përgjithshëm janë afro 57 mijë çështje në pritje. Një qytetari shqiptar mund t’i duhen deri në 10-12 vite për të marrë një vendim përfundimtar gjyqësor, me mbi 6 vite pritje vetëm në Apel dhe rreth 5 vite në Gjykatën e Lartë.
Më alarmanti është fakti se stoku i dosjeve gjyqësore është rritur me mbi 30% krahasuar me vitin 2024. Pra, jo vetëm që sistemi nuk po e ul krizën, por po fundoset edhe më thellë nga viti në vit.
Me këtë ritëm, në vitin 2028 Shqipëria mund të ketë mbi 200 mijë dosje gjyqësore të pazgjidhura. Kjo është katastrofë kombëtare për shtetin ligjor dhe për vetë besimin e qytetarëve tek drejtësia.
Kur drejtësia vonon për një dekadë, qytetari humbet besimin tek shteti, tek ligji dhe tek demokracia. Një biznes falimenton pa marrë vendim gjykate. Një familje pret me vite për një pronë, një dëmshpërblim apo një të drejtë elementare. Kjo nuk është drejtësi europiane, por drejtësi e paralizuar.
Raportet tregojnë gjithashtu se sistemi i drejtësisë sot funksionon me vetëm rreth 70% të kapacitetit normal, me mbi 100 vakanca gjyqtarësh në të gjithë vendin. Në disa gjykata, një gjyqtari i duhet të përballojë deri në 2000 dosje në ngarkim. Këto nuk janë më probleme rutinë administrative. Këto janë shenja të qarta të kolapsit të sistemit të drejtësisë.
Raportet ndërkombëtare, por edhe vetë raportet e SPAK-ut dhe institucioneve të tjera të drejtësisë, tregojnë qartë se Shqipëria vazhdon të përballet me korrupsion masiv, pastrim parash, ekonomi informale dhe depërtim të krimit të organizuar në sektorë kyç të ekonomisë dhe jetës publike të vendit.
Dhe në vend që qeveria të reflektojë për këtë katastrofë, Edi Rama vazhdon të dalë çdo ditë në televizor për t’u shitur shqiptarëve propagandë boshe për integrimin europian.
Nuk ka dhe nuk do të ketë anëtarësim të Shqipërisë në Bashkimin Europian pa drejtësi funksionale, pa luftë reale ndaj korrupsionit, pa ndëshkim të përfituesve të paracaktuar, pa goditje të pastrimit të parave dhe pa institucione të pavarura nga pushteti politik.
Nuk mund të ketë BE kur qytetari pret 12 vite për drejtësi.
Dhe mbi të gjitha, nuk mund të ketë drejtësi të pavarur kur vetë Kryeministri ndërhyn publikisht apo politikisht sa herë që hetimet afrohen pranë pushtetit, ministrave, aferave apo klientëve të qeverisë.
Shqiptarët shohin çdo ditë presionin politik, intimidimin publik dhe përpjekjet për të ndikuar institucionet e drejtësisë sa herë që preken interesa të lidhura me qeverinë.
Partia Demokratike do të vazhdojë të denoncojë çdo përpjekje për kapjen politike të drejtësisë dhe çdo tentativë për të mashtruar shqiptarët me fasadë integrimi, ndërkohë që shteti ligjor po shembet përditë para syve të tyre.
