Policia tentoi t'i ndalonte, qytetarët "shqyejnë" gardhin metalik, përplasen me efektivët

Me tensione ka nisur protesta e katërt kundër projektit turistik në Zvërnec. Teksa qindra qytetarë dhe aktivistë po marshonin drejt Kryeministrisë, një grup protestuesish ka tentuar të çajë kordonin metalik të vendosur nga policia në zonën e Urës së Lanës.

Në terren vihet re një prezencë e madhe e forcave të Policisë së Shtetit, të cilat kanë krijuar një perimetër sigurie me barriera metalike dhe efektivë të shumtë për të kontrolluar lëvizjen e protestuesve drejt institucioneve qendrore.

Për disa minuta janë regjistruar momente tensioni, ndërsa protestuesit kanë kundërshtuar vendosjen e gardhit metalik dhe kanë kërkuar kalimin drejt segmentit që të çon në zonën e Kryeministrisë. Forcat e policisë kanë mbajtur pozicionet e tyre, ndërsa situata ka vijuar të mbetet nën monitorim.

Lidhur me masat e marra, Drejtori i Përgjithshëm i Policisë së Shtetit, Skënder Hita, deklaroi se vendosja e gardhit nuk ka lidhje me protestën, por me planin e sigurisë për ndeshjen miqësore Shqipëri-Izrael.

“Kjo zonë është zonë sigurie për ndeshjen Shqipëri-Izrael. Prandaj është marrë kjo masë. Janë masa sigurie që merren në çdo ndeshje dhe nuk mund të bëjmë ndryshime sot”, tha Hita.

Protesta kundër projektit në Zvërnec po zhvillohet për të katërtën ditë radhazi. Qytetarët dhe aktivistët kërkojnë ndalimin e investimit, ndërsa qeveria vijon ta mbrojë atë si një projekt strategjik për zhvillimin e turizmit dhe ekonomisë së vendit. Situata mbetet dinamike, ndërsa protestuesit vijojnë grumbullimin në zonën pranë kordonit të policisë.