"Pozita e Ballukut është rënduar"-Gjekmarkaj: SPAK të kërkojë sërish arrestimin e saj, të shkohet edhe tek ‘Perandori’

Deputeti i Partisë Demokratike, Agron Gjekmarkaj komentoi edhe çështjen e ish zëvendës kryeministres Belinda Balluku, duke theksuar se Prokuroria e Posaçme duhet të kërkojë sërish heqjen e imunitetit të deputetes.

Ai theksoi se ndaj Ballukut janë shtuar akuza më të rënda dhe se nuk ka më asnjë justifikim që kryeministri Edi Rama të mund ta mbrojë atë sërish nga arrestimi.

“Mbi zonjën Balluku rëndojnë akuza të rënda. Kur erdhi çështja e imunitetit të saj në parlament, Edi Rama përdori standard të dyfishtë, duke përdorur sofizma të tipit se nuk është akuzuar për korrupsion. Në dijeninë time, këto akuza janë rënduar dhe SPAK duhet të jetë koherent dhe nuk do të kishte asnjë justifikim nëse pengohet sërish nga ana e qeverisë dhe Ramës dhe mendoj se duhet të shtrohet sërish.”, tha ai, në intervistën për emisionin “Kjo Javë”.

Ai theksoi se drejtësia mund të veprojë për një episod apo person të caktuar të implikuar, por e rëndësishme është që të shkohet më lart, te kryeministri Edi Rama, që ai e cilësoi si ‘Perandori’.

“Mendoj që përgjegjësinë kryesore për çdo gjë le të themi madje nëse do për gjërat pozitive që ka bërë qeveria si meritë, por më shumë për atë koleksion gjërash negative që na shoqërojnë në jetën e përditshme deri tek emrat që përmendëm, skandalet e tyre korrupsioni, akuzat, krejt sistemi, se ne kemi dhe AKSHI-n që është një gropë tjetër e madhe, e zezë dhe e turpshme. Të gjitha këto lidhen me emrin e kryeministrit, sepse ai është, le të themi, figura qendrore, figura kontrolluese dhe ka ndërtuar një sistem të tillë si ai i patronazhimit të shoqërisë.

Është patronazhimi i brendshëm piramidal i pushtetit, ku ai ka të gjithë njerëzit e tij që nuk mund të lëvizin, mendoj as qerpikun pa marrë miratimin e tij. Po kështu që mund të zgjidhet një episod, mund të veprojë drejtësia, por fenomeni mbetet, problemi mbetet dhe do të kemi të tjerë personazhe dhe duket sikur ne jemi në një arenë ku gëzohemi me personazhet e radhës, por në fakt perandori është atje sipër dhe e shijon lojën. Çështja kryesore është tek perandori”, u shpreh ai.