Presidenti Begaj dekreton shkarkimin e Vlora Hysenit nga drejtimi i SHISH

Presidenti i Republikës, Bajram Begaj, ka dekretuar këtë të martë shkarkimin e Vlora Hysenit nga detyra e Drejtorit të Shërbimit Informativ të Shtetit (SHISH).

Sipas njoftimit të Presidencës, vendimi është marrë në mbështetje të nenit 93 të Kushtetutës dhe nenit 5, paragrafi 2, të ligjit nr. 8391, datë 28.10.1998, “Për Shërbimin Informativ të Shtetit”, i ndryshuar.

Shkarkimi është bërë me propozim të Kryeministrit.

Vendimi i Presidentit vjen pas masës së sigurisë “arrest në shtëpi” dhe pezullimit nga ushtrimi i detyrës të vendosur ndaj Hysenit nga Gjykata e Posaçme, në kuadër të një hetimi të SPAK-ut të lidhur me dosjen e AKSHI-t.

Më herët gjatë ditës, Hyseni ishte raportuar se ndodhej jashtë vendit, ndërsa në mbrëmje u raportua se ajo ishte vetëdorëzuar në Policinë e Kosovës dhe po shoqërohej drejt Shqipërisë për ekzekutimin e masës së sigurisë.

Vlora Hyseni drejtonte SHISH-in që prej vitit 2023.