Protestat masive kundër qeverisë, Lubonja: Rama ka djegur disa breza! Të rinjtë po kërkojnë të respektohen dhe t’u dëgjohet fjala

Analisti Fatos Lubonja komentoi protestat masive të qytetarëve shqiptarë, të cilët kanë mbushur prej ditësh sheshin kundër qeverisë së Edi Ramës.

Ai theksoi se tashmë brezi i ri theu “tabunë” e mosngritjes në protestë dhe tanimë po dalin në rrugë duke kërkuar të drejtat e tyre.

Ai tha se kryeministri Edi Rama ka “djegur” disa breza, duke përmendur disa forma sipas tij, si korruptimi apo largimi i tyre jashtë vendit.

“Mendoj se është një politizim i një shtrese që janë të rinjtë, i bukur do të thosha, që lind nga nevoja që një brez prit dhe thotë se jam edhe unë këtu. Edhe ne kur ishim ne donim të thonim se jemi këtu. Brezin tim e shkatërroi Enver Hoxha. Kështu ka bërë Rama, ka djegur disa breza. Brezin e Erion Veliajt se djegia bëhet në shumë forma, si blerja.

Brezi Mjaft që doli kundër komunistëve të vjetër. E futi atë brez dhe e korruptoi, edhe nxjerrja jashtë vendit është djegie. Protesta e studentëve ishte një brez që tani janë rritur. I ke në shesh një pjesë të tyre. Jemi përsëri një brez i ri që në vend që të respektohet, që t’i dëgjohet fjala, që kanë kërkesa të arsyeshme.

Në vend të kësaj tentohet të denigrohet, shahet, minimizohet dhe shtypet. Jemi në lojë nëse do të shtypet apo do të rezistojë”, tha Lubonja.