Protestë në Shkodër kundër konsullatës serbe, qytetarët: I kemi të freskëta plagët

Një grup qytetarësh kanë dalë këtë të diel në protestë në qendër të Shkodrës, duke kundërshtuar hapjen e një konsullate serbe në qytet, por edhe duke shprehur pakënaqësi ndaj qeverisë.

Protestuesit marshuan në rrugët e Shkodrës me pankarta dhe flamuj kombëtarë, ndërsa gjatë fjalimeve të tyre deklaruan se krijimi i një konsullate serbe në këtë qytet është i papranueshëm.

Sipas tyre, Shkodra nuk ka lidhje historike, ekonomike apo diplomatike që të justifikojë një përfaqësi të tillë, ndërsa përmendën edhe historinë e konfliktit në Kosovë dhe krimet e kryera gjatë luftës nga forcat serbe.

Qytetarët i kërkuan autoriteteve të rishikojnë vendimin dhe të mos lejojnë hapjen e konsullatës, duke theksuar se kjo çështje prek ndjeshmëri kombëtare dhe historike.

Gjatë protestës u dëgjuan edhe thirrje kundër qeverisë, ndërsa tubimi u zhvillua pa incidente dhe nën monitorimin e autoriteteve.