Protestuesit “luftë” me dy fronte! Një pjesë nuk braktisi sheshin, pjesa tjetër mësyn drejt Politeknikut ku liruan studentët që po mbaheshin nga rojet e sigurisë në godinë

Protesta e 30-të kundër qeverisë Rama është shoqëruar me një situatë të pazakontë, duke krijuar dy vatra proteste njëkohësisht. Ndërsa një pjesë e qytetarëve vijuan tubimin para Kryeministrisë, një grup tjetër u nis me shpejtësi drejt Universitetit Politeknik, pasi u përhap lajmi se studentët ishin bllokuar brenda godinës.

Gjithçka nisi pasi studentët shpalosën në fasadën e Universitetit Politeknik një banderolë gjigante me mbishkrimin: "Studentët: Ju erdhi fundi! Shqipëria nuk është në shitje." Banderola, e shoqëruar me flakadanë, tërhoqi menjëherë vëmendjen e protestuesve dhe kalimtarëve.

Sipas protestuesve, pak çaste më vonë banderola u hoq nga punonjës të sigurisë private, të cilët më pas mbyllën dyert e godinës, ndërsa studentët ndodheshin brenda.

Lajmi shkaktoi reagim të menjëhershëm. Një pjesë e protestuesve u larguan nga Kryeministria dhe marshuan drejt Politeknikut për t'u bashkuar me studentët dhe për të kërkuar rikthimin e banderolës.

Para godinës u krijuan momente tensioni, ndërsa protestuesit kërkuan të rimerrnin banderolën. Në vendngjarje pati edhe përplasje verbale mes protestuesve dhe punonjësve të sigurisë, të cilët ruanin hyrjen e universitetit.