Ministrja e Ekonomisë, Delina Ibrahimaj, ka deklaruar sot pas mbledhjes së qeverisë se në kuadër të programit do të je...
POLITIKE
'Rama gati të paguajë për një foto me Trump',/ Tomorri: S’ka akses në Washington
PiranjatPërditësimi i fundit 22 Janar 2026, 18:54
I ftuar në emisionin “Task-Forcë” në Syri TV, me moderatore Sonila Meçon, gazetari Klodian Tomorri ka analizuar mungesën e Kryeministrit Edi Rama në Forumin e Davos, duke e quajtur një justifikim të pavërtetë arsyen që ai dha për të mos marrë pjesë, si mikpritjen e vajzës së presidentit amerikan, Ivanka Trump, në Shqipëri.
Tomorri theksoi se Rama është i gatshëm të bëjë çfarëdo dhe të paguajë për një foto me Donald Trump, por nuk ka shkuar në një ngjarje ku ishte i pranishëm presidenti më i fuqishëm i botës. Ai e cilësoi këtë si një kontradiktë të plotë, duke u ndalur edhe tek mundësitë fizike dhe logjistike që Rama kishte për të realizuar të dyja takimet.
Gazetari theksoi se Rama nuk ka akses në Uashingtonin zyrtar dhe se raportet e tij me Ambasadën e SHBA-ve në Tiranë janë praktikisht të ngrira, duke theksuar se diplomacia e tij me SHBA-në është e bllokuar. Tomorri e përfundoi analizën duke pohuar se marrëdhëniet e Kryeministrit me familjarët e Presidentit Trump, si Ivanka Trump dhe Jared Kushner, nuk mund të zëvendësojnë diplomacinë zyrtare, dhe se Rama ka humbur çdo mundësi për të pasur ndikim në politikën amerikane.
Pjesë nga deklarata:
Ajo që ne po diskutonim dhe që ka të bëjë me mungesën e çuditshme të pjesëmarrjes së zotit Rama në Davos, përtej justifikimeve që jep kryeministri, se "unë kisha vajzën e presidentit amerikan këtu dhe duhej ta mikprisja atë", ka një gjë që e dinë të gjithë. Edi Rama është i gatshëm të bëjë çfarëdo dhe të paguajë pafund për një foto me Donald Trump. Qoftë edhe një foto, jo më të ishte i ulur në një tryezë, në një tryezë me presidentin e Shteteve të Bashkuara të Amerikës.
Dhe kjo i rrëzon të gjitha ato alibitë apo justifikimet që kryeministri bën përse nuk shkoi në Davos. Sepse, siç u diskutua këtu, ai ka pasur kohë, e ka pasur mundësinë të priste, të darkonte me vajzën e presidentit dhe gjithashtu të shkonte në Davos. Ky njeri që merr charter-in, që ka përdorur charter-a pafund dhe ka shkuar në aktivitete OJF-sh që nuk kishin asnjë vlerë, tani vendosi të mos shkojë në një aktivitet ku ishte njeriu më i fuqishëm i botës, presidenti Donald Trump. Pra, duket se zoti Rama, pavarësisht darkave, dhe unë nuk e shoh ndonjë ngjarje të madhe faktin që ai shkoi dhe darkoi me vajzën e presidentit Donald Trump, se, në fakt, para dy ose tre ditësh ai ishte me Jared Kushnerin, në një foto diku jashtë shtetit, në një aktivitet.
Çështja është që zoti Rama nuk ka akses në Uashingtonin zyrtar. Dhe kjo tashmë është e qartë për të gjithë. Nuk ka akses, jo vetëm atje, por edhe raportet me ambasadën e Shteteve të Bashkuara të Amerikës këtu në Tiranë janë të ngrira. Praktikisht ne e kemi parë, nuk ka vizita të ngarkuarës me punë në kryeministri, nuk ka takime të veçanta...
Duket sikur Uashingtoni zyrtar, dhe Uashingtoni zyrtar është më i madh sesa presidenti, ka vendosur një barrierë ndaj qeverisë së Shqipërisë. Një barrierë që nuk mund të thyhet me darkat që zoti Rama mund të hajë, qoftë me vajzën e presidentit Trump, Ivanka Trump, qoftë me dhëndrin e tij, Jared Kushner.
