“Rama ik”/ Protesta kundër ndërtimit në Zvërnec, qytetarja: Patronazhistët po provokojnë dhunë, mos bini pre!

Thirrjet “Rama ik” kanë dominuar protestën kundër projektit turistik në Zvërnec, ndërsa qytetarë dhe aktivistë të mbledhur përpara Kryeministrisë kanë bërë apel për qetësi dhe shmangie të çdo përplasjeje.

Gjatë tubimit, një qytetare iu drejtua protestuesve me një mesazh për të mos rënë pre e provokimeve, duke pretenduar se persona të infiltruar po përpiqen të nxisin tensione dhe incidente.

“Ju lutemi të gjithëve, mos bini pre e provokimeve. Patronazhistët janë mes nesh duke provokuar dhunë. Duan të sabotojnë këtë bashkim madhështor të shqiptarëve. E arritëm qëllimin, erdhëm para Kryeministrisë. Kërkojmë dorëheqjen. Ne nuk jemi të dhunshëm si kjo qeveri dhe oligarkët”, deklaroi ajo para protestuesve.

Apeli i saj u prit me duartrokitje dhe thirrje kundër qeverisë, ndërsa pjesëmarrësit vijuan të kërkojnë ndalimin e projektit në Zvërnec dhe dorëheqjen e Kryeministrit.