Rama shfaqet si kuzhinier, qytetarja me pankartë pikante: Gatuan plane në kurriz të shqiptarëve!

Një pankartë e veçantë ka tërhequr vëmendjen gjatë protestës në sheshin “Skënderbej”, ku një qytetare ka ironizuar kryeministrin Edi Rama përmes një mesazhi politik.

“Gatuan plane në kurriz të shqiptarëve”, shkruhej në pankartën e saj, ndërsa reagimi lidhej me një nga paraqitjet e fundit publike të Ramës, ku ai shfaqej duke gatuar peshk, përballë kabinetit të tij qeveritar.

Protestuesja e komentoi këtë imazh si një simbol të mënyrës së qeverisjes së Ramës.

“Është e njëjta skenë. Sa herë ulen në patronazhin e krimit, aty mund të jetë një projekt, një president. Shtrohet kjo tryezë dhe aty fillon dhe gatuan kryeministri ynë”, u shpreh ajo.

Duke vijuar kritikën e saj, qytetarja tha se Shqipërisë i duhet një drejtues me vizion dhe plane konkrete.

“Edhe pse mund të jetë një ndër profesionet e vjetra kuzhinieri, nuk është kuzhinier i mirë. Por nuk më pëlqejnë as pikturat e tij. Ai nuk është as piktor i mirë, se i doli keq algoritmi. Dua një menaxher për Shqipërinë, që të jetë me plane dhe jo të ecë kuturu”, deklaroi ajo.