Rama thërret në tryezë "drejtësinë", më 28 shtator diskutohet mekanizmi i pagave

Kryeministri Edi Rama ka ftuar drejtuesit e institucioneve të sistemit të drejtësisë në një tryezë të përbashkët konsultimi, ku në fokus do të jetë mekanizmi për përcaktimin dhe rishikimin e pagave në sistemin e drejtësisë.

Takimi do të zhvillohet më 28 shtator, në orën 12:30, në Kryeministri, dhe sipas shkresës zyrtare do të shërbejë si pikënisje e një procesi konsultimi, dialogu dhe bashkërendimi ndërinstitucional.

Në tryezë janë ftuar Këshilli i Lartë Gjyqësor, Këshilli i Lartë i Prokurorisë, Gjykata e Lartë, Prokuroria e Përgjithshme, institucionet e posaçme të drejtësisë, gjykatat dhe prokuroritë e juridiksionit të përgjithshëm, si edhe organizatat përfaqësuese të gjyqtarëve dhe prokurorëve.

Sipas shkresës, diskutimi do të përqendrohet te parimet, kriteret dhe instrumentet që duhet të udhëheqin politikën e pagave, duke marrë në konsideratë qëndrueshmërinë buxhetore, koherencën ndërinstitucionale dhe proporcionalitetin mes funksioneve dhe përgjegjësive.

Qëllimi i konsultimit është ndërtimi i një qasjeje të përbashkët institucionale për një mekanizëm të qëndrueshëm, koherent dhe të parashikueshëm të pagave, me rregulla të qarta dhe objektive për përcaktimin dhe rishikimin periodik të tyre.