16-vjeçari Arjon Xhezairi ka ndërruar jetë në Spitalin e Traumës në Tiranë, pasi nuk arriti t’u mbijetonte plagë...
POLITIKE
Ron Yeffet në përgjimet e bujshme, Bushkolaj: 'Akses i pakufizuar' te milionat, pse nuk vepron SPAK?
PiranjatPërditësimi i fundit 15 September 2026, 19:38
Audiopërgjimet e publikuara së fundmi kanë ngritur pikëpyetje mbi rolin e Ron Yeffet dhe aksesin që ai pretendohet se kishte në çështje që lidhen me investime dhe biznese me vlerë miliona euro në Shqipëri.
Gazetari Elkier Bushkolaj tha se nga përgjimet dalin dy elemente që, sipas tij, duhen parë me vëmendje: pretendimi se “qeveria na ka kontraktuar për punët e pista” dhe referencat për atë që ai e cilësoi si “manipulim të ambasadës amerikane”.
“Janë dy elementë që ne duhet t’i kryqëzojmë me këtë. Është elementi i parë që thotë ‘ne, qeveria na ka kontraktuar për punët e pista’ dhe është elementi i dytë për manipulimin e ambasadës amerikane”, deklaroi Bushkolaj.
Në qendër të diskutimit ishte Ron Yeffet, të cilin gazetari e përshkroi si një person me akses të konsiderueshëm në çështje që lidhen me sektorë strategjikë.
“Nëse në Ukrainë flasim për kontrata dhe flasim për tendera në një vend që është në luftë, ne këtu shohim Ron Yeffetin, i cili është ministër pa portofol. Por është ministër pa portofol në një ministri ku qarkullojnë miliona euro brenda fundditës”, u shpreh Bushkolaj.
Sipas tij, audiopërgjimet ngrenë pikëpyetje jo vetëm për një rast të veçantë biznesi, por edhe për mundësinë që e njëjta mënyrë veprimi të përdoret ndaj aseteve të tjera me rëndësi ekonomike.
Sipas tij, ajo që ngre shqetësimin më të madh është niveli i aksesit që pretendohet se kanë personazhe të tillë në institucionet dhe sektorët ku administrohen interesa të mëdha ekonomike.
“Tregon se si shteti është në duar të disa spekulantëve, të cilët kanë akses të pakufizuar”, tha Bushkolaj.
Ai ngriti pikëpyetje edhe për mungesën e veprimeve institucionale pas daljes së materialeve audio, duke kërkuar hetimin e rolit të personave që përmenden në to.
"Ndërkohë, institucionet e drejtësisë, veçanërisht SPAK, janë nën akuzë për pasivitet të thellë. Edhe pse këto ngjarje kanë ndodhur muajt dhe vitet e fundit, dhe audiopërgjimet qarkullojnë prej kohësh (duke rënë deri në duart e ish-zëvendëskryeministrit Arben Ahmetaj), nuk ka asnjë veprim konkret", deklaroi Bushkolaj për "Syri.net"
