"Shqipëria nuk shitet"/ Nis protesta e pestë për Zvërnecin, qytetarët: Dorëheqje e Ramës dhe qeverisë

Ka nisur protesta e pestë në mbrojtje të Zvërnecit, ku qytetarët kundërshtojnë projektin për ndërtimin e një resorti turistik në zonën e mbrojtur.

Grumbullimin e protestuesve është bërë në sheshin “Skënderbej”, për të vijuar më pas me marshimin drejt Kryeministrisë.

“Zëri ynë, dinjiteti ynë, e ardhmja jonë” është slogani që do të shoqërojë protestën e kësaj të enjteje, ndërsa organizatorët dhe pjesëmarrësit kanë theksuar vazhdimisht se lëvizja qytetare është jashtë përkatësive politike.

Tubimi i djeshëm u shoqërua me tensione, pasi policia vendosi gardhe metalike për të bllokuar avancimin e protestuesve. Situata u përshkallëzua në përplasje mes qytetarëve dhe efektivëve, ndërsa u raportua edhe përdorimi i ujit me piper nga autobotet e policisë.

Pavarësisht incidenteve, protestuesit vijuan marshimin dhe qëndresën e tyre, duke artikuluar në kor një sërë sloganesh kundër projektit në Zvërnec, si dhe thirrje për dorëheqjen e qeverisë dhe kryeministrit Edi Rama.

Protestuesit kërkojnë anulimin e projektit që, sipas tyre, rrezikon një prej zonave më të rëndësishme të mbrojtura në vend, ndërsa kanë paralajmëruar se mobilizimi do të vijojë deri në tërheqjen e plotë të planit të ndërtimit.