Shqiptarët 30 ditë revoltë, kërkojnë dorëheqjen e Ramës! Pjesë e protestës sot edhe 4 eurodeputetë

Prej 30 ditësh me radhë, qytetarë nga e gjithë Shqipëria vijojnë protestën e tyre në Tiranë, duke kërkuar dorëheqjen e kryeministrit Edi Rama dhe ndryshim të kursit të qeverisjes. Edhe këtë mbrëmje, protesta pritet të mbledhë qindra qytetarë para Kryeministrisë, ndërsa organizatorët kanë njoftuar se pjesë e tubimit do të jenë edhe katër eurodeputetë.

Pas një muaji marshimesh të përditshme, protestuesit shprehen se nuk do të tërhiqen derisa kërkesat e tyre të merren në konsideratë. Ata kërkojnë largimin e Edi Ramës, mbrojtjen e pasurive publike dhe më shumë llogaridhënie nga qeveria.

Sipas organizatorëve, prania e katër eurodeputetëve në protestën e sotme shihet si një sinjal mbështetjeje dhe vëmendjeje ndaj zhvillimeve në Shqipëri. Ata pritet të ndjekin nga afër tubimin dhe të takohen me përfaqësues të protestuesve.

Ashtu si në mbrëmjet e mëparshme, qytetarët do të grumbullohen në qendër të Tiranës për të marshuar drejt godinës së Kryeministrisë, ku do të mbahen fjalime dhe do të përsëritet kërkesa kryesore e protestës: dorëheqja e kryeministrit Edi Rama. Protestat kanë vijuar çdo ditë gjatë muajit të fundit, duke u shndërruar në një nga mobilizimet më të gjata qytetare të kohëve të fundit.