'Shqiptarët janë gati për BE, Rama ende jo!’/ Eurodeputetja shuplakë Ramës: Dëgjo popullin, jo oligarkët!

Vizita e eurodeputetëve të grupit Gjelbër/EFA në Tiranë u shndërrua në një tjetër sinjal alarmi për qeverinë e Edi Ramës. Ndërsa propaganda vazhdon të shesë një Shqipëri “model”, mesazhi që erdhi nga përfaqësuesit e Parlamentit Europian ishte krejt i kundërt: qytetarët po mbrojnë demokracinë, ndërsa qeveria po largohet gjithnjë e më shumë nga standardet europiane.

Përballë protestuesve, eurodeputetja Tineke Strik nuk kurseu kritikat. Ajo vlerësoi qytetarët që po ngrihen kundër padrejtësive dhe goditi drejtpërdrejt mënyrën se si qeveria po sillet me zërat kritikë.

“Ju jeni ata që po mbroni vlerat dhe të drejtat e Bashkimit Europian, ndërsa qeveria nuk po e bën”, deklaroi ajo, duke rrëzuar narrativën se çdo kritikë ndaj pushtetit është pengesë për integrimin.

Mesazhi ishte edhe më therës kur Strik ngriti shqetësimin për intimidimin e aktivistëve dhe mungesën e demokracisë funksionale, duke lënë të kuptohet se problemi i Shqipërisë nuk janë qytetarët që protestojnë, por një qeveri që duket gjithnjë e më e shkëputur nga njerëzit.

Sipas saj, shqiptarët janë shumë më pranë Europës sesa vetë qeveria e tyre.

“Populli është gati për Bashkimin Europian, por qeveria ende jo”, ishte një nga deklaratat që përbën një kritikë të fortë politike ndaj mazhorancës.

Një tjetër goditje erdhi për modelin e zhvillimit të ndjekur nga qeveria Rama. Duke folur për ndërtimet në zonat e mbrojtura, Strik kërkoi që vendimet të mos diktohen nga interesat e investitorëve të fuqishëm, por nga interesi publik dhe mbrojtja e natyrës.

Madje mesazhi që ajo tha se do të çojë në Bruksel ishte edhe më i drejtpërdrejtë: Komisioni Europian duhet t’ia bëjë të qartë Edi Ramës se është koha të dëgjojë qytetarët e tij dhe jo investitorët e pasur.

“Nëse shqiptarët nuk e pranojnë këtë, kjo është një shenjë shprese. Dhe një provë se Shqipëria po i përket Bashkimit Europian.

Dhe në fakt është e qartë që ju jeni ata që po mbroni vlerat dhe të drejtat e Bashkimit Europian, ndërsa qeveria nuk po e bën.

Ju gjithashtu nuk e pranoni që këtu nuk ka demokraci. Ju luftoni për të drejtat dhe liritë tuaja dhe nuk e pranoni që të jeni të intimiduar, të përndjekur apo subjekte të fushatave kundër jush.

Dhe unë po e çoj këtë mesazh tek Bashkimi Europian, në Bruksel: njerëzit janë gati të bëhen anëtarë të Bashkimit Europian, por qeveria nuk është ende gati për këtë.

Kështu që unë ju inkurajoj që të vazhdoni mobilizimin, të vazhdoni protestat.

Ne do të luftojmë në Bruksel për të njëjtat vlera, për të njëjtën natyrë dhe për demokracinë.

Pjesa më e madhe e Parlamentit Europian u shpreh se duhet të ketë një moratorium për të ndaluar ndërtimin dhe ligji duhet apeluar.

Dhe le të vazhdojmë të luftojmë për këtë. Ne do të kthehemi në Bruksel me këtë mesazh dhe do t’i themi Komisionit Europian që ju duhet më në fund të veproni dhe t’ia bëni të qartë Ramës që të dëgjojë njerëzit e tij dhe jo investitorët e pasur të huaj.

Faleminderit shumë. Ne do të jemi atje për ju.”