Policia e Lezhës ka dhënë detaje lidhur me shpërthimin me tritol në fshatin Balldren i Vjetër në Lezhë.
Blut&eum...
POLITIKE
'Shqiptarët më në fund po reagojnë'/ Muka: Rama pati një tragjikomedi me gazetarët e huaj
PiranjatPërditësimi i fundit 11 Qershor 2026, 08:56
I ftuar në emisionin “Kafe Shqeto” në Syri TV, nën moderimin e Flavio Qarrit, studiuesi Taulant Muka komentoi zhvillimet e fundit politike dhe protestat qytetare në vend, duke theksuar se ato po dëshmojnë bashkimin e shqiptarëve përtej bindjeve politike, fetare dhe sociale.
Sipas Mukës, protestat kanë sjellë së bashku qytetarë me bindje të ndryshme, të majtë e të djathtë, besimtarë të feve të ndryshme, përfaqësues të organizatave të shoqërisë civile, si dhe individë me qëndrime të ndryshme sociale, të gjithë të bashkuar rreth një qëllimi të përbashkët.
Muka vlerësoi gjithashtu vëmendjen që protestat kanë marrë në arenën ndërkombëtare, duke theksuar se zhvillimet e fundit kanë sjellë një ekspozim të madh të situatës në Shqipëri. Ai iu referua edhe përplasjes së kryeministrit me gazetarët e huaj, duke argumentuar se ky episod i dha jehonë ndërkombëtare problematikave që, sipas tij, po përjetojnë qytetarët shqiptarë.
Duke folur për reagimet ndërkombëtare, studiuesi përmendi edhe qëndrimet e institucioneve europiane, të cilat, sipas tij, kanë treguar mbështetje ndaj protestave. Ai e cilësoi këtë si një zhvillim pozitiv për interesat e kombit shqiptar.
Më tej, Muka argumentoi se debati publik nuk duhet të fokusohet vetëm te individët apo liderët politikë, por te funksionimi i sistemit. Sipas tij, meritokracia dhe intelektualizmi janë dëmtuar ndër vite, ndërsa konkurrenca e ndershme është zbehur në institucione dhe parti politike.
Në radhë të parë, bota po shikon se sa të qytetëruar jemi ne shqiptarët kur jemi të bashkuar. Në atë protestë, ju e keni vënë re, keni qenë vetë në terren, ka nga të gjitha anët. I ke të majtë, i ke të djathtë, të krishterë, ortodoks, myslimanë, i ke pro familjes, i ke Sorosian, anti-Sorosian, janë të gjitha aty. Janë të gjithë aty për të bashkuar për një qëllim të përbashkët që nuk kemi... ka ardhur koha t'i lëmë dasitë dhe të ndërtojmë shtet. Ka 36 vite që luajnë dhe nuk kanë ndërtuar shtet. Më së fundmi shoqëria po reagon, po i kërkon një kryeministri: më së fundmi, të kemi dhënë kohë të mjaftueshme të veshësh pantallonat, se deri tani na ke udhëhequr me brekë, sepse e tillë është veshja zyrtare e kryeministrit kur shkon në institucionet ndërkombëtare. Dhe kjo është ajo që unë shoh. Përsa i përket mediave ndërkombëtare, si të thuash, të gjitha rrethanat janë bashkuar në mbështetje të shqiptarëve.
Jo nuk jam i fushës, por mesa duket po. Pra kemi një përplasje brenda PS-së që është në interesin tonë, kemi një përplasje edhe në Shtetet e Bashkuara të Amerikës dhe institucionet ndërkombëtare që është po në mbështetjen tonë. Ka marrë një vizibilitet të jashtëzakonshëm. Ne patëm tragjikomedinë e kryeministrit me gazetarët ndërkombëtarë. Ishte fati jonë që sjellja anormale e një kryeministri i dha vizibilitet në gjithë botën. Pra sot nuk e kanë parë vetëm shqiptarët, e ka parë gjithë bota se me çfarë shteti kemi të bëjmë. Me një shtet që nuk dëgjon qytetarët, me një shtet që nuk do t'i kuptojë qytetarët, me një shtet që nuk do të zhvillojë potencialin e shqiptarëve.
Dhe ju patët më së fundmi dhe reagimin e Zyrës së Bashkimit Europian që ka dalë në mbështetje të protestave. Pra, të gjitha situatat dalin në favor të, le të themi, kombit shqiptar. Dhe kjo është një situatë që ne të gjithë duhet t'i gëzojmë, të gjithë duhet të bashkohemi sikurse e shohim situatën në terren. Dhe unë mendoj gjithmonë këtu nuk kemi të bëjmë vetëm me çështje emrash, duhet të largohemi nga miti i emrave, qoftë te Partia Demokratike, qoftë te Partia Socialiste, qoftë edhe ata qytetarë që janë në terren, duhet të fokusohemi te sistemi. Ne kemi vrarë meritokracinë, kemi vrarë intelektualizmin, në drejtim të partive, në drejtim të institucioneve janë njerëz që përgjithësisht kanë mungesa të theksuara të formimit që i duhet për atë nivel përfaqësimi. Është vrarë, si të thuash, konkurrenca e ndershme në të gjitha institucionet.
I gjithë pushteti është i centralizuar në dy apo tre individë, qoftë në parti qoftë në shtet. Dhe ka ardhur koha që ne të luftojmë për të ndërtuar një përfaqësim dinjitoz ku çdo institucion është i pavarur. Edhe pastruesja në thonjëza është një institucion, nuk e prek askush. E kjo është e bukura e kësaj proteste.
