Sot protesta e 114-të kundër qeverisë, qytetarët ‘zbresin’ sërish në shesh: Rama jep dorëheqjen

Protesta e qytetarëve kundër qeverisë së Edi Ramës ka hyrë në ditën e 114-të. Edhe sot, ata do të zbresin sërish në bulevardin përpara Kryeministrisë, duke kërkuar dorëheqjen e Ramës dhe kabinetit të tij.

Protesta pritet të vijojë me të njëjtin format, me grumbullimin e qytetarëve fillimisht në sheshin “Skënderbej”, marshimin drejt bulevardit “Dëshmorët e Kombit”, fjalimet që mbahen para godinës së Kryeministrisë dhe më pas marshimin në rrugët e Tiranës.Thirrjet kanë qenë të vazhdueshme për të protestuar edhe përpara Parlamentit, pasi i cilësojnë deputetët si jo të zgjedhur nga ata.

“Rama jep dorëheqjen”, “Ju erdhi fundi”, “Arrestoni Ramën”, “Arrestoni Ballukun”, “Arrestoni Berishën” apo “Shqipëria po bën revolucion”, “Nuk na përfaqësoni” janë disa nga thirrjet që kanë karakterizuar protestën e qytetarëve që vijon prej fundit të muajit maj.