VIDEO- Sot dita e 20-të e revoltës/ Rama largohet nga zyra pak para nisjes së tubimit, ironizojnë protestuesit

Teksa pritet të nisë protesta e 20-të kundër qeverisë, kryeministri Edi Rama është larguar nga ambientet e Kryeministrisë.

Në një video të publikuar pak para nisjes së tubimit, Rama shihet teksa futet në automjetin e tij dhe largohet nga godina e qeverisë. Në sfond dëgjohen zërat e disa protestuesve, të cilët e ironizojnë kryeministrin me thirrje dhe komente gjatë momentit të largimit.

Protesta e sotme vjen në vijim të një serie tubimesh që prej 20 ditësh po zhvillohen në Tiranë dhe qytete të tjera të vendit. Ajo nisi fillimisht si reagim ndaj projektit në Zvërnec, por më pas u shndërrua në një lëvizje më të gjerë kundër qeverisë.

Qytetarët që marrin pjesë në protestë kërkojnë dorëheqjen e kryeministrit Edi Rama, ndërsa në tubimet e fundit nuk kanë munguar thirrjet si “Rama ik”, “Jep dorëheqjen” dhe “Ju erdhi fundi”.

Ndërkohë, protestuesit janë mbledhur në Sheshin “Skënderbej”, nga ku pritet të marshojnë drejt Kryeministrisë për të vijuar protestën e radhës kundër qeverisë.