Kim Kardashian ka rrëfyer se kishte dyshime përpara martesës me ish-basketbollistin e NBA-së, Kris Humphries, por vendosi të vaz...
POLITIKE
Spahia: Benet Beci duhet të japë dorëheqjen, Bashkia e Shkodrës s'mund të qëndrojë nën hijen e korrupsionit
PiranjatPërditësimi i fundit 12 January 2026, 10:56
I ftuar në emisionin e mëngjesit Kafe Shqeto” me gazetarin Flavio Qarri, deputeti i PD-së Bardh Spahia, theksoi se kryebashkiaku i Shkodrës, Benet Beci, duhet të japë menjëherë dorëheqjen.
Spahia argumentoi se përgjimi i bisedës së Becit me Ervis Berberin, ku diskutohet hapur ndarja e fondeve publike përfshirë shprehjen famëkeqe “500 mijë euro për profesorët e Harvardit dhe 320 mijë euro për ne me dy klasë shkollë”, tregon qartë përfshirjen e tij në skema korruptive.
Ai kritikoi ashpër mungesën e përgjegjësisë morale të mazhorancës dhe theksoi se qëndrimi i Becit në krye të Bashkisë dëmton rëndë imazhin e institucionit dhe besimin e qytetarëve. Spahia kërkoi gjithashtu që Beci, të japë dorëheqjen për të çliruar karrigen e kryetarit dhe të ndalojë çdo ndërhyrje në procesin gjyqësor.
Sipas Spahisë, ky nuk është rast i izoluar pasi Beci është vetëm një nga të paktën 12 kryebashkiakët e mazhorancës që përballen me akuza për korrupsion.
Pjesë nga deklarata:
Një ndër detyrat kryesore të përfaqësuesve të popullit, dhe në rastin konkret të deputetit, është denoncimi i çdo lloj afere korruptive dhe mbrojtja e interesit publik dhe qytetar. Është një ndër aspektet kryesore të punës sonë dhe të detyrimeve tona si parlamentarë.
Në rastin konkret, sigurisht që çdokush mund të thotë se e dinte, nuk është se nuk e dinte. Por ajo që bën përshtypje në rastin e Benet Becit, dhe jo vetëm, është se tashmë jemi mësuar të shohim afera korruptive madhore kryesisht të lidhura me qeverisjen qendrore, duke filluar nga kryeministri, ministrat, zv/ministrat dhe drejtorët e institucioneve kryesore shqiptare. Ndërkohë, përfshirja e përfaqësuesve vendorë ka kaluar pak në hije, edhe pse ata nuk janë të pakët në numër.
Janë të paktën 12 kryetarë bashkish të kësaj mazhorance që janë direkt të akuzuar për korrupsion. Në rastin konkret të zotërisë Beci, ai është i akuzuar. Sigurisht që fajësinë do ta vendosë gjykata, por fakti mbetet.
Prokuroria ka bindjen që faktet qëndrojnë, pasi ka ngritur akuzën dhe ka dërguar çështjen për gjykim. Në rastin e Benet Becit nuk ka asnjë denoncues ndaj të cilit të mund të ketë dyshime për vërtetësinë. Vetë prokuroria ka zbuluar përfshirjen e tij gjatë hetimeve të tjera, duke përfshirë edhe një komunikim me Ervis Berberin që evidenton përfshirje në aferë korruptive dhe ndarjen e parave publike, përfshirë shprehjen e famshme për 500.000 euro për profesorët e Harvardit dhe 320.000 euro për dy klasa shkollë.
Qytetarët shkodranë kanë qenë të vetëdijshëm për mënyrën se si u fitua Bashkia e Shkodrës. Përfshirja e Benet Becit, Elisa Spiropalit dhe direkt e kryeministrit Edi Rama në tjetërsimin e vullnetit qytetar ka qenë e qartë, duke përdorur presionin e institucioneve shtetërore, premtime për punësime, paratë e trafiqeve të drogës dhe krimin e organizuar haptazi gjatë periudhës elektorale, duke kulmuar me pamjet e ditës së zgjedhjeve në 2023.
Ky është një model i Edi Ramës, një modus operandi që nuk i shmanget dot. Ai ka përdorur krimin e organizuar, paratë e pista dhe institucionet shtetërore për zgjedhjet e përgjithshme dhe lokale. Qytetarët kanë vuajtur presionin edhe në zgjedhjet e 11 Majit 2025. Shtabi elektoral i zotit Beci u arrestua menjëherë pas zgjedhjeve, dhe tani është dërguar për gjykim i gjithë stafi administrativ i bashkisë.
Çështja tani nuk është ligjore, pasi rrugëtimi gjyqësor ka kohët dhe teknikalitetet e veta, por shtrohet moralisht. Politika nuk ka vetëm aspekt ligjor, por edhe detyrime morale. Është e trishtë të shikosh se nga kjo mazhorancë ka rënë çdo normë morale: njerëzit akuzohen me fakte, por askush nuk mban përgjegjësi morale.
Minimalisht, si detyrim moral dhe respekt ndaj qytetarëve shkodranë, Benet Beci duhet të japë dorëheqjen, për të çliruar simbolikisht karrigen e kryetarit të bashkisë nga një person i akuzuar për korrupsion dhe vjedhje. Kjo është e nevojshme për institucionin e Bashkisë së Shkodrës. Një i akuzuar mund të përdorë influencën e pushtetit për të ndikuar në procesin gjyqësor.
Në rastin e ripërsëritjes së zgjedhjeve të parakohshme, opinioni publik dhe kërkesa e përfaqësimit nga shkodranët duhet të merren parasysh. Urgjente për ne është çlirimi i karriges nga një person i akuzuar për vjedhje. Mazhoranca ka detyrimin moral të veprojë në këtë drejtim.
Benet Becit i them: liro karrigen e kryetarit të Bashkisë Shkodër nga turpi i akuzës për vjedhje. Shkodra nuk e meriton këtë. Shkodra është qyteti i kulturës, dijes dhe qytetarisë. Qyteti ka respektuar maksimalisht qytetarët dhe interesin publik, por Bashkia tani është e mbyllur hermetikisht, dhe tenderat publikë janë në shumicë problematike, duke ngjallur dyshime për afera të tjera.
Probabiliteti është i lartë, por duhet theksuar aspekti moral i çështjes: gjyqet mund të vazhdojnë, por tani duhet të ndodhë çlirimi i karriges nga akuza për vjedhje.
