Strasburgu pa marrëveshje/ Rama: Eurodeputetët votuan për Shqipërinë, opozita zgjodhi protestën

Komiteti Parlamentar për Stabilizim-Asocim Shqipëri–Bashkimi Evropian nuk arriti të miratojë një rezolutë të përbashkët në mbledhjen e zhvilluar në Strasburg, pasi drafti përfundimtar nuk mori mbështetjen e deputetëve të Partisë Demokratike.

Dokumenti u votua nga deputetët e Partisë Socialiste dhe eurodeputetët, ndërsa përfaqësuesit e opozitës votuan kundër, duke bërë të pamundur miratimin me konsensus.

Pas zhvillimeve në Strasburg reagoi edhe kryeministri Edi Rama. Përmes një postimi në rrjetet sociale, ai krahasoi qëndrimin e eurodeputetëve me atë të opozitës shqiptare.

“Pra, të gjithë eurodeputetët, madje edhe dikush që erdhi dhe protestoi në Shqipëri, votuan për Shqipërinë së bashku me deputetët e Partisë Socialiste. Sepse Shqipëria nuk ndalon. Ndërsa deputetët e pakicës në Shqipëri votuan kundër dhe u larguan për të shkuar në protestë. Sepse Partia Socialiste nuk ndalet”, shkroi Rama.

Sipas socialistëve, tekstit të përgatitur nga Sekretariati i Komitetit Parlamentar iu bashkëngjitën edhe rezoluta e Parlamentit Evropian dhe rezoluta e miratuar nga Kuvendi i Shqipërisë për procesin e anëtarësimit në Bashkimin Evropian. Për këtë arsye, ata vlerësuan se nuk kishte nevojë për amendamente shtesë në dokumentin përfundimtar.

Mosdakordësia mes palëve bëri që Komiteti Parlamentar për Stabilizim-Asocim ta mbyllte mbledhjen pa një rezolutë të përbashkët.