Studentët “ndezin” Politeknikun! Banderolë gjigande dhe flakadanë kundër qeverisë: Ju erdhi fundi! Shqipëria nuk është në shitje

Ndërsa mijëra qytetarë protestonin para godinës së Kryeministrisë në protestën e 30-të kundër qeverisë, një grup studentësh kanë shpalosur një banderolë gjigante në fasadën e Universitetit Politeknik të Tiranës, e shoqëruar nga flakadanë dhe thirrje kundër qeverisë.

Ashtu si në protestat e mëparshme, studentët janë vendosur në ballë të marshimit, duke përsëritur kërkesën për largimin e qeverisë dhe dorëheqjen e panegociueshme të kryeministrit Edi Rama.

Në banderolën e vendosur në godinën e universitetit shkruhet: "Studentët: Ju erdhi fundi! Shqipëria nuk është në shitje."

Mes flakadanëve të ndezur, mesazhi i studentëve është bërë një nga momentet më simbolike të protestës së kësaj mbrëmjeje, duke e kthyer fasadën e Politeknikut në një pikë referimi të tubimit.

Ndërkohë, policia ka ndërhyrë për heqjen e banderolës, ndersa studentët i janë drejtuar me fjalët: "Nuk ju lejohet të shkelni Brenda ambienteve të Universitetit. Mos u bëni mish për top". /PiranjatNews/