16-vjeçari Arjon Xhezairi ka ndërruar jetë në Spitalin e Traumës në Tiranë, pasi nuk arriti t’u mbijetonte plagë...
POLITIKE
"Treni i fundit për Veliajn"/ Gazetari: Çfarë pritet pas vendimit të Gjykatës së Lartë
PiranjatPërditësimi i fundit 15 September 2026, 21:53
Gazetari Eni Ferhati ka komentuar vendimin e Gjykatës së Lartë për kryebashkiakun e Tiranës, Erion Veliaj, i cili kishte kërkuar ndryshimin e masës së sigurisë “arrest në burg”.
Sipas Ferhatit, tre gjyqtarët që shqyrtuan çështjen kanë qenë unanimë në qëndrimin e tyre për të mos pranuar kërkesën për rishqyrtim dhe për të lënë në fuqi vendimin e Gjykatës së Posaçme të Apelit të marsit 2025, që parashikon vijimin e masës së sigurisë “arrest në burg”.
Duke analizuar vendimmarrjen, gazetari e cilësoi atë si “trenin e fundit” për Veliajn, sa i përket mundësisë për të përfituar një masë më të butë sigurie.
Ferhati argumentoi se, pas qëndrimeve të Gjykatës së Lartë dhe Gjykatës Kushtetuese, gjasat që Gjykata e Posaçme apo Apeli i Posaçëm të ndryshojnë masën e sigurisë në një kërkesë të ardhshme janë të pakta.
“Sot ky ishte treni i fundit për zotin Veliaj, në kuptimin e një mase më të butë sigurie”, tha Ferhati, duke shtuar se për sa kohë Gjykata e Lartë dhe Gjykata Kushtetuese nuk kanë marrë një vendim në favor të ndryshimit të masës, nuk pret një qasje të tillë as në shkallët e tjera të gjyqësorit.
“Vendimi që u dha sot duhet të kemi parasysh që ishte në një seancë në dhomë këshillimi. Tre gjyqtarët, që sipas informacioneve kanë qenë unanimë në qëndrimin e tyre, refuzuan, mospranuan rishqyrtimin dhe lanë në fuqi vendimin e Gjykatës së Posaçme të Apelit të marsit të vitit 2025, për vijimin e masës së arrestit me burg. Në vetvete sot gjykata ka shqyrtuar rekursin, po themi, sepse Gjykata Kushtetuese shqyrtoi ankimin lidhur me rekursin e Gjykatës së Lartë, që më herët po ashtu kishte lënë në fuqi masën e arrestit me burg. Kështu që, ishte një rekurs, por nga pikëpamja procedurale dhe hierarkisë së sistemit tonë gjyqësor, mund të them fare mirë që sot ky ishte treni i fundit për zotin Veliaj, në kuptimin e një mase më të butë sigurie.
Për sa kohë që Gjykata e Lartë dhe Gjykata Kushtetuese nuk kanë një vendimmarrje të tillë, ta harrojmë që Gjykata e Posaçme dhe Apeli i Posaçëm, nisur këtu edhe nga precedentët, të kenë guximin apo qasjen që në të ardhmen, apo në muajt në vijim, të pranojnë një kërkesë të radhës të zotit Veliaj për zëvendësimin e masës së sigurisë ‘arrest në burg’. Dhe treni i fundit, jo vetëm në kuptimin e pozitës penale të zotit Veliaj, por ashtu siç e shikoj unë, ishte edhe treni i fundit në kuptimin e një qasjeje politike që ndoshta zoti Veliaj, këto shtatë apo tetë muaj sa i kanë mbetur në mandatin e tij në krye të Bashkisë së Tiranës, të gjejë edhe busullën e tij politike apo të bëjë edhe një lloj oponence, apo një lloj qasjeje që zoti Veliaj do të kishte në raport edhe me figurën e tij politike, jo vetëm me çështjen penale, që sigurisht është në radhë të parë”,- tha gazetari.
