Akili “trazon” Ferma VIP/ Zbulon skenarin e finales dhe një eliminim të parashikuar

Akili, ish-banor i edicionit të tretë të “Ferma VIP”, ka ndezur rrjetin pas një deklarate të fortë gjatë një videoje live në TikTok, ku pretendon se ka zbuluar detaje nga prapaskenat e formatit.

Sipas tij, ai ka parë një “copë letër” ku ishte i shkruar i gjithë zhvillimi i programit deri në finalen e madhe. Në këtë skenar të supozuar, përmendet edhe fati i një prej banoreve më të komentuara. Akili deklaron se Mimosa Ahmeti do të humbasë një sfidë dhe do të eliminohet pak para finales. Ai shton se ky vendim, sipas tij, është strategjik dhe lidhet me nevojën për të rritur audiencën në momentet kyçe të programit.

Por nuk mbaron me kaq.

Ish-banori foli edhe për zhvillimet romantike brenda fermës, duke konfirmuar se Ola dhe Adioni kanë bërë një hap të rëndësishëm në lidhjen e tyre, duke u fejuar. Sipas tij, ky veprim i ka dhënë fund zërave dhe dyshimeve që qarkullonin rreth tyre.

Deklaratat e Akilit kanë shkaktuar reagime të menjëhershme në rrjet, duke ndarë fansat mes atyre që besojnë versionin e tij dhe atyre që e shohin si një përpjekje për vëmendje.

Tani mbetet për t’u parë nëse këto pretendime do të rezultojnë të vërteta në javët në vijim të “Ferma VIP”.