Ankand për 100-vjetorin e Marilyn Monroe, ekspozohen foto të rralla dhe objekte ikonike

Foto të pabotuara të Marilyn Monroe dhe një koleksion i rrallë sendesh personale të ikonës së Hollivudit do të dalin në ankand më 1 qershor, në kuadër të 100-vjetorit të lindjes së aktores legjendare.

Sipas mediave ndërkombëtare, ankandi do të organizohet nga shtëpia “Julien’s Auctions” dhe do të përfshijë mes 350-400 artikuj që lidhen me jetën dhe karrierën e Monroe-s. Mes tyre janë fotografi të papublikuara më parë, dokumente personale, veshje, si dhe receta e shkruar me dorë për mbushjen e gjelit të detit për darkën e Falënderimeve.

Explore 100 Years of Marilyn, now open for bidding in partnership with Turner Classic Movies (@tcm), celebrating the life, legacy, and timeless glamour of Marilyn Monroe.

Celebrating the 100th birthday of Marilyn Monroe, one of Hollywood’s most magnetic figures, this landmark… pic.twitter.com/tgZB4Q3X7s

— Julien's Auctions (@JuliensAuctions) May 7, 2026

Në ankand do të ekspozohen edhe objekte të tjera me vlerë historike, si një fustan mbrëmjeje Jeanne Lanvin, një kontratë e vitit 1949 me agjencinë William Morris dhe karta e anëtarësimit të Marilyn Monroe në Screen Actors Guild nga viti 1956.
Një nga artikujt më të veçantë është një fotografi e realizuar në vitin 1962 nga Alan Grant, vetëm pak javë para vdekjes së saj tragjike. Po ashtu, pjesë e ankandit do të jetë edhe buzëkuqi Max Factor që aktorja përdori gjatë xhirimeve të filmit të saj të fundit “Something’s Got to Give”, i cili mbeti i papërfunduar.

Atraksioni kryesor i ankandit pritet të jetë dera e gjelbër e shtëpisë së saj në Los Angeles, ku Marilyn Monroe u gjet e vdekur më 5 gusht 1962, në moshën 36-vjeçare.

Bashkëthemeluesi i Julien’s Auctions, Martin Nolan, u shpreh se ndikimi i Marilyn Monroe vazhdon të mbetet i jashtëzakonshëm edhe dekada pas vdekjes së saj.
“Pati jetë para Marilyn Monroe dhe jetë pas saj, por ajo mbetet një yll i pakrahasueshëm, ndikimi i së cilës vazhdon të jehojë edhe sot,” deklaroi ai.
Ankandi pritet të tërheqë koleksionistë dhe adhurues të aktores nga e gjithë bota, duke rikthyer edhe një herë në qendër të vëmendjes trashëgiminë e pavdekshme të ikonës së kinemasë amerikane.