Ariana Grande reagon pasi ekipi i Trumpit përdori sërish muzikën e saj në një video kundër personave transgjinorë

Ariana Grande reagoi ashpër pasi llogaria zyrtare e Team Trump në TikTok përdori muzikën e saj në një video të re.Videoja, e publikuar të enjten dhe që deri tani ka marrë më shumë se 357 mijë shikime, përdor këngën e Grandes të vitit 2024, “We Can’t Be Friends (Wait for Your Love)”, ndërsa në pamje shfaqet Donald Trump gjatë tubimit të tij të 27 tetorit 2024 në Madison Square Garden, në New York.

Duke iu referuar vargjeve të këngës së Grandes, Team Trump trajtoi në video debatin e vazhdueshëm rreth personave transgjinorë në Shtetet e Bashkuara, përfshirë kundërshtimin e administratës ndaj pjesëmarrjes së grave transgjinore në sportet e grave.Në tekstin e shfaqur në video shkruhej: “Unë dhe e vërteta ime qëndrojmë në heshtje... burrat nuk mund të lindin fëmijë dhe nuk duhet të garojnë kurrë në sportet e grave”.

Në përshkrimin e videos, Team Trump shtoi: “Kjo nuk duhet të jetë e diskutueshme. #trump #arianagrande #maga.”

Grande, 33 vjeçe, e mori vesh për videon e TikTok-ut dhe përdori seksionin e komenteve për të dënuar përdorimin e muzikës së saj në videot që lidhen me Trump.

“Mos e përdorni më kurrë muzikën time,” shkroi ajo, përpara se t’i drejtohej edhe mesazhit të videos kundër personave transgjinorë: “Gjithashtu, e vërteta juaj është e pavërtetë”.

Një burim pranë këngëtares fituese të çmimit Grammy i tha Daily Mail se kompania e saj diskografike, Republic Records, po punon për heqjen e këngës nga postimi i Team Trump.Ndërkohë, burime pranë Trump theksuan se videoja e së enjtes, në të cilën u përdor muzika e Grandes, nuk u publikua nga Shtëpia e Bardhë dhe as nga vetë presidenti.

Team Trump, e cila konsiderohet si “faqja zyrtare e fushatës së Trump në TikTok” dhe ka rreth 14 milionë ndjekës, menaxhohet nga ekipi i presidentit për rrjetet sociale. Reagimet ndaj postimit të Team Trump ishin të ndara, pasi si mbështetësit e Grandes, ashtu edhe ata të Trump shprehën mendimet e tyre në seksionin e komenteve.