Arrestohet ish-gruaja e Eminem, Kim Scott kapet sërish në gjendje të dehur

Ish-bashkëshortja e reperit të famshëm Eminem, Kim Scott, është rikthyer sërish në qendër të vëmendjes pas një arrestimi të ri për drejtim mjeti në gjendje të dehur. Mediat e huaja raportojnë se ajo u arrestua nga autoritetet në Michigan dhe u dërgua në burgun e Qarkut Macomb, në Mt. Clemens.

Sipas raportimeve, Kim u ndalua nga policia vetëm tre ditë pasi ishte paraqitur në gjykatë për akuza të ngjashme. Detektivi Joseph Feld nga Departamenti i Policisë së Chesterfield Township deklaroi për TMZ se 50-vjeçarja dyshohet se është përplasur me një automjet tjetër pranë Detroitit, ndërsa drejtonte makinën nën ndikimin e alkoolit.

Fatmirësisht, nga incidenti nuk u raportuan persona të lënduar, ndërsa Kim Scott është liruar më pas nga autoritetet. Vetëm pak ditë më parë, ajo kishte pranuar fajësinë në gjykatë për një tjetër rast të drejtimit të mjetit në gjendje të dehur dhe për mosraportim të një aksidenti të ndodhur në muajin shkurt.

Sipas dosjes hetimore, gjatë atij incidenti Kim dyshohet se u përplas me një makinë të parkuar, ndërsa po dërgonte për pazar djalin e saj adoleshent Parker dhe miqtë e tij.

Problemet me ligjin nuk janë të reja për ish-partneren e Eminem. Gjatë dy dekadave të fundit, ajo është arrestuar disa herë për çështje që lidhen me abuzimin me substanca, drejtimin e mjetit nën ndikimin e alkoolit dhe shkelje të ndryshme të trafikut.

Kim Scott dhe Eminem u martuan fillimisht në vitin 1999, u divorcuan në 2001, për t’u ribashkuar sërish në vitin 2006. Megjithatë, martesa e dytë zgjati vetëm pak muaj, pasi reperi paraqiti kërkesën për divorc tre muaj më vonë.