Dështimi më i madh i Eurovision 2026? Këto vende nuk bindën askënd

Finalja e madhe e Eurovision Song Contest 2026, e mbajtur në Vjenë, solli emocione, surpriza dhe jo pak zhgënjime për disa prej vendeve pjesëmarrëse. Ndërsa Bullgaria arriti të triumfonte me këngëtaren Dara dhe këngën “Banagaranga”, tre shtete u konsideruan si dështimet më të mëdha të këtij edicioni pasi nuk arritën të fitonin asnjë pikë nga publiku.

Britania e Madhe ishte një prej zhgënjimeve kryesore të mbrëmjes. Përfaqësuesi britanik Sam Battle, i njohur me emrin artistik “Look Mum No Computer”, performoi këngën “Eins, Zwei, Drei”, por publiku nuk e vlerësoi performancën e tij. Kjo renditje riktheu edhe njëherë diskutimet mbi rezultatet e dobëta të Britanisë në Eurovision gjatë viteve të fundit.

Një tjetër vend që dështoi të marrë mbështetjen e publikut ishte Gjermania. Sarah Engels performoi këngën “Fire”, por nuk arriti të siguronte asnjë votë nga televotimi.

Të njëjtin fat pati edhe Belgjika, e përfaqësuar nga Essyla me këngën “Dancing on the Ice”, e cila gjithashtu përfundoi me zero pikë nga publiku.

Ndërkohë, finalja u shoqërua edhe me polemika, pasi disa vende si Spanja, Holanda, Irlanda, Sllovenia dhe Islanda u tërhoqën nga festivali në shenjë proteste ndaj pjesëmarrjes së Izraelit në garë.

Në rrjetet sociale, rezultatet e këtyre vendeve u komentuan gjerësisht nga fansat e Eurovisionit, të cilët e cilësuan edicionin e këtij viti si një nga më të debatueshmit dhe më të paparashikueshmit të viteve të fundit.