Fshehu 8 mln euro kokainë në kamionin që transportonte rroba të markës së Kim Kardashian, dënohet shoferi

Një shofer kamioni që transportonte veshje të kompanisë SKIMS, në pronësi të Kim Kardashian, është dënuar nga drejtësia britanike me më shumë se 13 vite burg, pasi u kap duke fshehur kokainë me vlerë rreth 8 milionë euro në ngarkesën e tij.

40-vjeçari polak, Jakub Jan Konkel, u arrestua në shtator të vitit 2025 nga autoritetet doganore në Harwich, port në juglindje të Anglisë, pasi mbërriti me traget nga Hook of Holland.

Kamioni i tij, që transportonte 28 paleta me rroba dhe të brendshme të markës Skims, iu nënshtrua kontrollit me rreze X nga autoritetet britanike.

Sipas deklaratës së Agjencisë Kombëtare kundër Krimit, ngarkesa ishte e ligjshme dhe as eksportuesi, as importuesi nuk kishin lidhje me trafikun e drogës. Megjithatë, në pjesën e pasme të rimorkios ishte krijuar një vend i fshehtë për transportin e narkotikëve.

Brenda tij u gjetën 90 pako, secila me nga një kilogram kokainë, me një vlerë tregu prej rreth 7.2 milionë paundësh, ose 8.28 milionë euro.

Fillimisht, Konkel mohoi të kishte dijeni për praninë e drogës në kamion, por më vonë pranoi fajësinë për trafik narkotikësh.

Ai rrëfeu para hetuesve se kishte pranuar të transportonte kokainën në këmbim të një pagese prej 4.500 eurosh. Gjykata e Chelmsford e dënoi atë me 13 vite e gjysmë burg.