Ish-i i Jennifer Lopez i jep fund romancës 3-vjeçare me trajneren e fitnesit

Alex Rodriguez dhe partnerja e tij prej gati tre vitesh, Jaclyn Cordeiro, i kanë dhënë fund lidhjes së tyre. Sipas raportimeve të fundit, ndarja ka ndodhur rreth dy muaj më parë dhe ka qenë krejtësisht pa drama apo konflikte.

Në një deklaratë për TMZ, Jaclyn Cordeiro u shpreh se mes tyre vazhdon të ketë dashuri, respekt dhe mbështetje reciproke. Ajo theksoi se nuk ka pasur tradhti, debate apo ndonjë skandal që çoi në ndarje. Sipas saj, të dy po ruajnë marrëdhënie të mira edhe për hir të familjeve dhe fëmijëve të tyre.

Cordeiro tregoi gjithashtu se aktualisht është e përqendruar te një çështje serioze shëndetësore që prek një anëtar të familjes së saj, duke kërkuar privatësi dhe mirëkuptim nga publiku dhe media.

Alex Rodriguez dhe Jaclyn Cordeiro nisën lidhjen në vitin 2022 dhe shpesh shfaqeshin bashkë në rrjetet sociale, sidomos gjatë stërvitjeve dhe aktiviteteve sportive. Ish-lojtari i baseball-it madje kishte treguar se programi i fitnesit i Jaclyn e ndihmoi të humbiste mbi 30 kilogramë.

Rodriguez njihet edhe për lidhjen e famshme që pati me këngëtaren dhe aktoren Jennifer Lopez. Dyshja ishin të fejuar përpara se të ndaheshin në vitin 2021, një histori që bëri shumë bujë në mediat rozë.