Jonida Maliqi mbështet protestën në Tiranë: Nuk kërkojmë lëmoshë, por respekt

Jonida Maliqi i është bashkuar reagimeve publike për protestën që po zhvillohet në Tiranë, duke ndarë në rrjetet sociale një video nga marshimi i protestuesve dhe një mesazh të fortë në mbështetje të kauzës së tyre.

Në postimin e saj, këngëtarja thekson se shqiptarët nuk dorëzohen kur bëhen bashkë dhe se zëri kundër padrejtësisë po ngrihet çdo ditë e më shumë. Sipas saj, protesta tashmë nuk është vetëm një betejë për mbrojtjen e tokave dhe pasurive natyrore, por edhe për të drejtat themelore të qytetarëve, duke përfshirë arsimin, shëndetësinë, të drejtat e njeriut dhe dinjitetin.

“Kur një popull zgjohet, padrejtësia nuk mund të bëhet më normë”, shkruan Maliqi në mesazhin e saj, ndërsa nënvizon se qytetarët nuk kërkojnë privilegje apo lëmoshë, por respekt dhe të drejtat që u takojnë.

Reagimi i artistes vjen në ditën e 21-të të protestës, e cila vijon të mbledhë mbështetje nga figura publike, qytetarë dhe pjesëtarë të diasporës.