Microsoft po ofron një plan të ri për largim vullnetar nga puna për rreth 60,000 punonjës në Shtetet e Bashkuara, Kanada, Indi dh...
SHOWBIZ
Kanosja ndaj Alaudin Hamitit/ Autori shpëton pa burg, por merr gjobën e kripur
PiranjatPërditësimi i fundit 17 April 2026, 10:36
Gjykata Themelore në Prishtinë ka shpallur fajtor Liman Berishën për kanosjen ndaj moderatorit të njohur Alaudin Hamiti, duke mbyllur një çështje që kishte tërhequr vëmendje publike që prej ngritjes së aktakuzës.
Vendimi u mor nga gjyqtari i rastit, Eroll Gashi, i cili konstatoi se i pandehuri ka kryer veprën penale të “Kanosjes”.
Një ditë para shpalljes së aktgjykimit, Berisha kishte pranuar fajësinë, duke shprehur pendesë dhe duke kërkuar një dënim më të lehtë. Prokuroria nuk e kundërshtoi këtë pranim, duke i hapur rrugë vendimit përfundimtar të gjykatës.
Sipas aktgjykimit, Berisha është dënuar me gjobë në vlerë prej 2,500 eurosh, të cilën mund ta shlyejë në dy këste të barabarta. Gjykata gjithashtu ka vendosur ndërprerjen e masës së arrestit shtëpiak, ndërsa periudha e kaluar në këtë masë – nga 19 marsi deri më 16 prill 2026 – do të konvertohet në vlerë monetare, ku çdo ditë llogaritet si 20 euro e gjobës.
Në rast se i dënuari nuk e paguan gjobën, ajo do të zëvendësohet me dënim me burg, duke u përllogaritur një ditë burgimi për çdo 20 euro të papaguara.
Rasti lidhet me një ngjarje të ndodhur më 26 nëntor 2024, kur i pandehuri, përmes rrjeteve sociale, kishte dërguar mesazhe kërcënuese ndaj moderatorit. Sipas aktakuzës, këto veprime kishin shkaktuar ndjenjë frike dhe pasigurie te i dëmtuari.
Përveç gjobës, Berisha është obliguar të paguajë edhe shpenzimet procedurale, ndërsa pala e dëmtuar është udhëzuar që kërkesën pasurore ta ndjekë në rrugë civile.
