Kevin Hart zbulon sekretin e njerëzve të suksesshëm

Aktori dhe komediani i njohur Kevin Hart ka ndarë këndvështrimin e tij mbi suksesin, duke theksuar se një nga tiparet që bashkon njerëzit më të suksesshëm është gatishmëria për të bashkëpunuar dhe për të shfrytëzuar përvojën e të tjerëve.

Hart, i cili ka ndërtuar një karrierë të suksesshme në komedi, aktrim, produksion dhe biznes, tha se marrëdhëniet me njerëzit janë një element thelbësor për të krijuar mundësi të reja.

Sipas tij, njerëzit duhet të jenë të gatshëm të prezantojnë veten me profesionalizëm, të tregojnë ambicie dhe të mos humbasin mundësitë që mund t’u shfaqen.

Ai solli si shembull edhe takimin me themeluesin e Amazon, Jeff Bezos, duke nënvizuar rëndësinë e krijimit të marrëdhënieve me persona nga fusha të ndryshme.

Hart tha gjithashtu se nuk ka frikë të jetë personi me më pak njohuri në një dhomë, pasi kjo i jep mundësinë të mësojë nga të tjerët.

“Nuk dua të humbas momente që ndoshta nuk do të më jepen më kurrë”, është shprehur ai.

Sipas komedianit, suksesi i madh nuk ndërtohet gjithmonë duke shpikur diçka të re, por edhe duke bashkuar njohuritë, përvojën dhe burimet e njerëzve të tjerë.

“Për të bërë para serioze, nevojiten partneritete dhe bashkëpunim me njerëz që tashmë kanë përvojë”, ka deklaruar Hart.

Ai theksoi se njerëzit më të suksesshëm nuk ngurrojnë të bëjnë biznes me persona që kanë aftësi, ide dhe eksperiencë, duke e konsideruar bashkëpunimin një nga faktorët kryesorë të rritjes.

Në fund, Hart u ndal edhe te pasuria e tij, duke mohuar një vlerësim prej rreth 400 milionë dollarësh që i ishte përmendur në një intervistë. Ai nuk dha një shifër konkrete, por tha se suksesi nuk duhet të matet vetëm me paratë.

“Mendoj se vlera e vërtetë qëndron te lumturia”, përfundoi ai.