Krizë në çiftin Macron? Libri për Brigitte Macron ngre akuza për kontroll të stafit në Élysée dhe tensione me Presidentin

Një biografi e re me titull “Un Couple (Presque) Parfait”, nga gazetari Florian Tardif, ka rikthyer në qendër të vëmendjes Presidentin francez Emmanuel Macron dhe bashkëshorten e tij, Brigitte Macron, duke hedhur dritë mbi jetën e tyre personale dhe funksionimin e brendshëm të Pallatit Élysée.

Sipas autorit, marrëdhënia e çiftit presidencial është shoqëruar ndër vite nga tensione, xhelozi dhe një ndikim i konsiderueshëm i Zonjës së Parë në jetën personale dhe politike të Presidentit. Libri pretendon se Brigitte Macron ka pasur rol të drejtpërdrejtë në disa vendime që lidhen me stafin e presidencës, përfshirë edhe shqyrtimin e aplikimeve të grave që punojnë pranë Élysée-së.

Në disa pasazhe, autori përshkruan një atmosferë ku pasiguritë personale dhe diferenca në moshë mes bashkëshortëve kanë ndikuar në dinamikën e marrëdhënies së tyre. Sipas librit, Brigitte Macron ka shprehur në rreth të ngushtë shqetësime për stabilitetin e martesës së saj, duke theksuar frikën për të ardhmen e marrëdhënies.

Biografia ndalet gjithashtu tek ndikimi i saj në jetën politike të Emmanuel Macron, duke pretenduar se Presidenti francez u ka bërë të qartë bashkëpunëtorëve të tij se mirëqenia emocionale e bashkëshortes së tij është një element i rëndësishëm për stabilitetin e mandatit presidencial.

Libri rikthen në vëmendje edhe thashethemet dhe spekulimet që kanë shoqëruar Presidentin francez gjatë viteve të fundit, të cilat ai i ka mohuar vazhdimisht, duke i cilësuar si të pabazuara. Një pjesë tjetër e botimit trajton edhe incidentin e bërë publik gjatë një vizite zyrtare në Vietnam, ku një moment mes çiftit presidencial u interpretua gjerësisht në media ndërkombëtare dhe u shoqërua me komente të shumta në rrjet.

Autori kujton gjithashtu fillimet e marrëdhënies së tyre, kur Emmanuel Macron ishte 15 vjeç dhe Brigitte 40 vjeçe, atëherë mësuesja e tij në shkollën “La Providence” në Amiens, duke theksuar se lidhja e tyre ka qenë gjithmonë në qendër të vëmendjes publike.

Sipas Florian Tardif, pavarësisht polemikave dhe debateve, Brigitte Macron mbetet një figurë shumë e rëndësishme në jetën e Presidentit francez dhe një faktor ndikues në vendimmarrjet e tij politike dhe personale.

Libri pritet të shkaktojë reagime të forta në Francë, pasi sjell detaje të reja mbi jetën private të çiftit presidencial dhe funksionimin e brendshëm të Pallatit Élysée, në një moment politik të ndjeshëm për vendin.