Letra e panjohur e Dolly Parton drejtuar Eminem: Ndjej një lidhje të pashpjegueshme me ty

Eminem i bën homazh Dolly Parton, duke publikuar një mesazh që këngëtarja legjendare i kishte dërguar. Ai publikoi në Instagram letrën që Parton i kishte dërguar, ku spikaste edhe firma e saj rozë. Këngëtarja ia kishte dërguar mesazhin Eminem për ta uruar dhe nderuar me rastin e përfshirjes së tij në Rock & Roll Hall of Fame në vitin 2022.

“Më vjen keq që nuk patëm kurrë mundësinë të njiheshim”, shkroi Eminem në përshkrimin e postimit. “Por fakti që mora këtë letër nga Dolly më preku vërtet. Sigurisht, ajo nuk ishte e detyruar të gjente kohë për ta bërë këtë.”
“Edhe për një fëmijë që dëgjonte kryesisht rap, ajo ishte një idhull. Një superyll në çdo kuptim të fjalës. Pusho në paqe, Dolly. Dhe faleminderit për fjalët e tua të mira”, shtoi ai.

Në letrën e saj, Parton i shkruante artistit se, megjithëse “nuk di shumë për muzikën rap, kam kuptuar se ti je më i miri në këtë zhanër”. Ajo shkruante gjithashtu se ndiente një “lidhje të pashpjegueshme” me të.

“Shpresoja të të takoja në koncert, por e di sa të çmendura janë këto gjëra. Personalisht, i urrej dhe e humba mundësinë time, por ndoshta një ditë do të takohemi”, shkruante këngëtarja.
“Ndërkohë, vazhdo të bësh atë që bën, sepse e bën jashtëzakonisht mirë.

Dhe sado i ndërlikuar të jetë bota jote, dije se je shumë i veçantë dhe prek njerëzit në mënyra që as nuk mund t’i imagjinosh. Me dashuri dhe respekt, Dolly Parton”, përfundonte letra.

Në të njëjtin vit kur Eminem u përfshi në Rock & Roll Hall of Fame, Parton ishte gjithashtu kandidate. Fillimisht, ajo kërkoi që kandidatura e saj të tërhiqej.

“Edhe pse ndihem jashtëzakonisht e nderuar që jam nominuar për Rock & Roll Hall of Fame, nuk besoj se e kam fituar këtë të drejtë. Në të vërtetë, nuk dua që votat të ndahen për shkakun tim, ndaj duhet të tërhiqem me respekt”, deklaroi ajo në atë kohë, duke besuar se ceremonia e përfshirjes në këtë institucion ishte e destinuar për artistët e rokut.

Megjithatë, më vonë ajo ndryshoi qëndrim.

“Me sa duket, ata e vlerësojnë këtë bazuar te muzika dhe ndikimi që kanë pasur disa këngë, dhe besoj se kam bërë këngë me artistë të tjerë në këtë kuadër”, kishte thënë ajo për Billboard.
Në të vërtetë, Parton u përfshi në Rock & Roll Hall of Fame në vitin 2022, duke u ngjitur në skenë dhe duke deklaruar me humor: “Tani jam një yll i rokut.” /PiranjatNews/