Miley Cyrus tregon të pathënat nga propozimi surprizë: Tentova të gjeja unazën e fejesës, gati sa nuk shkatërrova gjithçka

Miley Cyrus ka rrëfyer një moment të pazakontë nga fejesa me muzikantin Maxx Morando, duke zbuluar se para se ai t’i propozonte në Japoni, ajo dyshonte se unaza e fejesës ishte fshehur diku me të. Këngëtarja 33-vjeçare foli për këtë moment gjatë një interviste me Zane Lowe për Apple Music, më 17 shtator. Ajo tregoi se gjatë një shëtitjeje në Kioto kishte krijuar bindjen se Morando e kishte unazën me vete dhe vendosi të kontrollonte nëse dyshimet e saj ishin të vërteta.

“Unë dhe Max po dilnim për një shëtitje dhe mendova: ‘Do ta kërkoj. Ai patjetër që ka një unazë fejese me vete. Kjo do të ishte koha më e mirë’”, tregoi Cyrus. Megjithatë, kërkimi i saj rezultoi i pasuksesshëm. Ajo shkoi në banjë dhe vendosi të mos e prishte udhëtimin duke bërë ndonjë skenë, duke menduar se ndoshta partneri i saj nuk e kishte unazën. Në fakt, Morando e kishte unazën me vete. Ai e kishte fshehur në një xhep pranë gjurit, të cilin Cyrus nuk e kontrolloi.

Pak më vonë, gjatë shëtitjes, Morando u ul në gjunjë dhe i bëri propozimin. “Lëshova një britmë habie, ndërsa ai ishte në gjunjë. Ai ishte përtokë, aq i ëmbël, dhe më tha: ‘Ti je dashuria e jetës sime. Do të martohesh me mua?’”, kujtoi Cyrus. Këngëtarja tha se në atë moment kuptoi se sa pranë kishte qenë për ta zbuluar surprizën. “Mendova: ‘O Zot, gati sa nuk e shkatërrova gjithçka’”, rrëfeu ajo. Çifti kishte diskutuar më parë për martesën dhe Cyrus kishte dhënë edhe disa sinjale për unazat që i pëlqenin, duke i dërguar partnerit të saj lidhje me modele të ndryshme.

Morando, nga ana tjetër, kishte treguar më herët se ishte përpjekur ta mbante propozimin sekret deri në momentin e fundit. Ai ka rrëfyer se ishte shumë nervoz kur u ul në një gju, duke u shqetësuar edhe se mund t’i binte unaza. Sipas rrëfimit të Cyrus, megjithëse ajo kishte dyshuar për surprizën, Morando arriti ta ruante sekretin dhe ta kthente shëtitjen në Kioto në një moment të veçantë për të dy.