Moza Ahmeti: Të sigurosh hormone për 13 vjeçarët, ose je budalla ose je komercializuar

Poetja e njohur dhe njëkohësisht fituesja e spektaklit të rekordeve Ferma VIP 3, Mimoza Ahmeti ka shprehur revoltë për shërbimin e terapisë hormonale, për personat mbi 13 vjeç.

E ftuar në studion e emisionit QUO VADIS të moderatores Pranvera Borakaj, Mimoza ka deklaruar se nuk është normale që të sigurosh hormone për fëmijë 13-14 vjeç, në një kohë kur nuk janë siguruar nevojat bazë për ta, siç është ushqimi dhe veshja.

 “A është mirë që ta braktisësh sakrificën ose sublimimin për karrierë? Nuk është mirë. A është mirë ta kalosh shkollën e familjes? Është një mrekulli. Sepse ra pandemia, çfarë i ngeli shoqërisë? Bëhen luftëra, çfarë i ngelet shoqërisë? Asgjë nuk i ngelet, familja bëhet mbrojtje. Do thuash ti “po sistemi nga familja buron”. Buron nga familja, por sistemi akoma nuk ka gjetur një opsion tjetër. Dhe këto opsione që po na ofron me këto hormonet, janë opsione që sistemi do të riproodhojë veten e vet me komoditetet e veta, por nuk janë opsione që t’i vijë vërtet në ndihmë njerëzimit për atë vonesë dëshirash që ai ka, që do të bëjë familje, fëmijë. Por shikon qëllimet e veta.

Sepse të sigurosh hormone për një fëmijë 13-14 vjeç në një kohë kur nuk ke siguruar bukë, ushqim dhe veshje të klasit normal për të gjithë shoqërinë fëmijërore, atëherë ose je budalla, ose je komercializuar në atë pikë që shikon vetëm qëllimet e tua komerciale dhe na i ofron këto gjëra si të drejta të njeriut”, tha Mimoza Ahmeti.