Lord Lucan, një aristokrat britanik, u zhduk në vitin 1974 pasi u akuzua se vrau gabimisht dadon e fëmijëve të tij, duke menduar se i...
SHOWBIZ
Nga student i nënvlerësuar në perandor të luksit, historia e jashtëzakonshme e Bernard Arnault!
PiranjatPërditësimi i fundit 15 Qershor 2026, 12:59
Dikur student i nënvlerësuar sot themelues i firmave të famshme të modës, biografia që rrëfen suksesin e miliarderit Bernard Arnault.
Një biografi e re kushtuar miliarderit francez Bernard Arnault po tërheq vëmendjen në Francë dhe më gjerë, duke hedhur dritë mbi jetën dhe ngritjen e njeriut që drejton sot grupin më të madh të luksit në botë, LVMH.
Libri “Bernard Arnault, son univers impitoyable”, i autores Audrey Millet, ndjek rrugëtimin e biznesmenit që nga fëmijëria e tij në rajonin verior të Francës deri në shndërrimin e tij në një nga njerëzit më të pasur dhe më me ndikim në botë.
Sipas të dhënave të përfshira në libër, pasuria e familjes Arnault vlerësohej në rreth 162 miliardë dollarë në qershor të vitit 2026.
Autorja përshkruan vitet e hershme të Arnault në një familje të pasur nga Roubaix, studimet në shkollat elitare franceze dhe hapat e parë në biznes.
Libri sjell gjithashtu detaje nga koha e tij në Politeknikun e Parisit, ku ai shquhej për aftësitë matematikore, veçanërisht në llogaritjen e probabiliteteve.
Një nga elementët më interesantë të biografisë është kontrasti mes vlerësimeve që Arnault mori në rini dhe suksesit të tij të mëvonshëm.
Sipas dokumenteve të cituara në libër, gjatë shërbimit ushtarak në vitet 1970 ai ishte cilësuar si i papërshtatshëm për të mbajtur pozicione me përgjegjësi.
Megjithatë, dekada më vonë ai drejton një perandori që përfshin 75 marka luksoze dhe mbi 200 mijë punonjës në mbarë botën.
Libri trajton gjithashtu rolin që ka luajtur shteti francez në fillimet e karrierës së tij dhe mënyrën se si Arnault ndërtoi gradualisht ndikimin në industrinë globale të luksit. Sipas revistës Forbes, ai hodhi themelet e suksesit të tij në vitin 1984, kur investoi 15 milionë dollarë nga biznesi familjar për të blerë markën ikonike Christian Dior.
Biografia ndalet edhe te ndikimi aktual i Arnault në arenën ndërkombëtare. Autorja vë në dukje se ai ishte i vetmi biznesmen evropian i pranishëm në inaugurimin e dytë të Donald Trump, duke e cilësuar atë si një nga figurat më të fuqishme të elitës ekonomike globale.
Sot, pesë fëmijët e Bernard Arnault mbajnë pozicione të rëndësishme brenda grupit LVMH, duke forcuar rolin e familjes në drejtimin e një prej perandorive më të mëdha të biznesit në botë. /tch
