Nga tapeti i kuq në lajmin më të bukur: Palvin dhe Sprouse do të bëhen prindër për herë të parë

Dylan Sprouse dhe Barbara Palvin do të bëhen prindër për herë të parë, duke ndarë me publikun një nga momentet më të bukura të jetës së tyre gjatë Festivalit të 79-të të Filmit në Cannes, në Francë.

Lajmi u bë i ditur më 14 maj, kur Barbara Palvin u shfaq në tapetin e kuq me një fustan elegant blu të hapur, me mëngë të shkurtra dhe fund me pupla, duke vendosur dorën mbi barkun e saj të rrumbullakosur, çka konfirmoi shtatzëninë. Pranë saj ishte bashkëshorti i saj, Dylan Sprouse, i veshur me smoking klasik, i cili e mbështeti gjatë gjithë momentit dhe pozoi krah saj me përqafim të lehtë.

Çifti, i cili është në një lidhje që prej vitit 2018, u njoh fillimisht në një event në vitin 2017. Marrëdhënia e tyre u zhvillua shpejt dhe u bë publike më vonë, duke u kthyer në një nga historitë më të ndjekura të showbiz-it ndërkombëtar. Në qershor 2023 ata u fejuan, ndërsa vetëm një muaj më vonë kurorëzuan dashurinë me martesë në Hungari.

Gjatë viteve, Sprouse dhe Palvin kanë folur shpesh për lidhjen e tyre të fortë dhe mbështetjen reciproke, duke treguar se përpiqen të mos qëndrojnë gjatë larg njëri-tjetrit për shkak të angazhimeve profesionale.

Barbara Palvin ka qenë gjithashtu e hapur për sfidat e saj shëndetësore, përfshirë një ndërhyrje kirurgjikale për endometriozë, për të cilën ka folur publikisht për të rritur ndërgjegjësimin.

Tani, çifti nis një kapitull të ri si prindër, duke emocionuar fansat në mbarë botën.