Skandali i drogës në Turqi, urdhër arrest për aktorët e njohur të serialeve, ja kush janë emrat

Prokuroria e Stambollit ka urdhëruar ndalimin e 25 personave nga bota e artit, medias dhe rrjeteve sociale në kuadër të një hetimi të gjerë për narkotikë. Mes emrave të përfshirë në hetim figurojnë këngëtarët Mabel Matiz, Berkay Şahin dhe Tan Taşçı, aktorët e mirënjohur Serenay Sarıkaya dhe Onur Tuna, si dhe disa figura të tjera publike.

Sipas autoriteteve, hetimi po zhvillohet si pjesë e një aksioni më të gjerë kundër trafikimit, prodhimit dhe përdorimit të lëndëve narkotike në Stamboll. Në dokumentet hetimore thuhet se ndaj të dyshuarve janë lëshuar urdhra ndalimi, kontrolli, marrjeje në pyetje dhe ekzaminimi biologjik.

Autoritetet deklaruan se operacionet e fundit kanë çuar më herët në sekuestrimin e sasive të mëdha të kokainës, të dyshuara si të trafikuara drejt Turqisë nga deti. Po ashtu, janë zhvilluar bastisje në disa zona të Stambollit ku janë sekuestruar lëndë narkotike dhe materiale të lidhura me aktivitet kriminal.

Sipas njoftimeve, nga 25 personat ndaj të cilëve janë lëshuar urdhra, 14 janë ndaluar gjatë operacionit në Stamboll dhe provincën e Muğlës, ndërsa disa të tjerë nuk janë gjetur në adresat e tyre pasi ndodhen jashtë vendit. Lista e të përfshirëve përfshin gjithashtu emra si Yağmur Ünal, Mirgün Cabas, Blok3 (Hakan Aydın), Feyza Civelek, Niran Ünsal dhe të tjerë nga fusha e artit dhe medias. Prokuroria thekson se hetimi është ende në vazhdim dhe se analizat e materialeve digjitale dhe provave të mbledhura kanë krijuar dyshime për përdorim të substancave narkotike dhe psikotrope nga disa prej të dyshuarve.

Operacioni vjen pas një serie aksionesh të mëparshme në Turqi që kanë përfshirë gjithashtu figura të njohura publike dhe persona të lidhur me industrinë e argëtimit.