Soni Malaj na riktheu Spirit Voice me një foto! Bëhen bashkë me Elian & Dorinën

Një foto e publikuar nga Soni Malaj ka rikthyer në vëmendje një prej grupeve më të veçanta të muzikës shqiptare, “Spirit Voice”.

Grupi, i krijuar në vitin 1997, ishte grupi i parë shqiptar i përbërë nga vajza dhe solli një frymë të re në skenën muzikore të asaj kohe. Pjesë e tij ishin Soni Malaj, Dorina Tiko dhe Elia Zaharia, ndërsa në saksofon ishte Briken Guga.

“Spirit Voice” korri sukses gjatë viteve të aktivitetit, por më pas vajzat morën rrugë të ndryshme në jetë dhe grupi u shpërnda.

Dorina Tiko u zhvendos në Shtetet e Bashkuara, ku jeton me bashkëshortin dhe fëmijët e saj, ndërsa vazhdon të jetë e lidhur me muzikën. Elia Zaharia iu përkushtua teatrit, ndërsa për një pjesë të rëndësishme të publikut, Soni Malaj u shndërrua në një prej emrave më të njohur të muzikës shqiptare.

Sot, një fotografi e publikuar nga Soni ka bërë bashkë sërish tre ish-anëtaret e “Spirit Voice”, duke sjellë nostalgji për një periudhë të rëndësishme të muzikës shqiptare.

Ribashkimi i tyre në një foto ka mjaftuar për të zgjuar kujtimet e fansave të grupit, që edhe pas kaq vitesh vazhdojnë ta kujtojnë “Spirit Voice” me nostalgji.