Stadiumi mohon marrëveshjen me organizatorët, anulohen koncertet e Kanye West në Shën Petersburg

Koncertet e planifikuara të reperit amerikan Kanye West (Ye) në Shën Petersburg të Rusisë nuk do të zhvillohen, pasi stadiumi Gazprom Arena ka bërë të ditur se nuk është nënshkruar asnjë marrëveshje qiraje me organizatorët e eventit. Në një postim në rrjetet sociale, drejtuesit e stadiumit deklaruan se, për shkak të mungesës së një kontrate zyrtare, koncertet e planifikuara për 10 dhe 11 tetor nuk do të mbahen në ambientet e tyre.

Lajmi vjen në një kohë kur paraqitjet e Kanye West janë përballur me kundërshti në disa vende evropiane, pas deklaratave të tij antisemite dhe përdorimit të simboleve naziste. Reperi, i njohur gjithashtu si Ye, kërkoi falje në janar, duke i lidhur deklaratat e tij me probleme shëndetësore, përfshirë një dëmtim të padiagnostikuar të trurit dhe çrregullimin bipolar të patrajtuar.

Nëse koncertet do të zhvilloheshin, West do të bëhej artisti i parë ndërkombëtar me famë të madhe që do të performonte në Rusi që nga nisja e pushtimit të plotë të Ukrainës nga Moska në vitin 2022. Megjithatë, stadiumi Gazprom Arena theksoi se kishte marrë ankesa lidhur me paraqitjen e planifikuar të reperit, duke sqaruar se nuk ka qenë dhe nuk është organizator i eventeve të tij.

Nga ana tjetër, Say Agency, kompania me seli në Moskë që kishte marrë përsipër organizimin e koncerteve, deklaroi se ishte informuar për vendimin përmes mediave dhe se deri tani koncertet nuk janë anuluar zyrtarisht.

Ndërkohë, disa politikanë rusë kanë shprehur publikisht kundërshtimin e tyre ndaj performancës së Kanye West. Deputeti konservator Vitaly Milonov sugjeroi që reperi të interpretojë këngë tradicionale ruse në vend të repertorit të tij, duke reflektuar qëndrimet anti-perëndimore të një pjese të politikës ruse.