Zbulohen detajet e para për Big Brother VIP, mes konkurrentëve një çift nga diaspora dhe një ish-banor!

Teksa kanë nisur përgatitjet për sezonet e reja të “Big Brother VIP Kosova” dhe “Big Brother VIP Albania”, kanë filluar të qarkullojnë edhe informacionet e para për konkurrentët e mundshëm.

Gazetari Agon Rexhepi tregoi se ditët e fundit ka parë disa figura publike pranë ambienteve të Klan Kosovës, duke lënë të kuptohet se vizitat e tyre mund të lidhen me sezonin e ri të BBVK.

“Unë i di disa detaje të reja. Disa njerëz që i kam parë afër në hapësirat tona, nuk mendoj që vizitat e tyre kanë qenë të rastësishme”, u shpreh ai.

Një prej informacioneve që tërhoqi më shumë vëmendje lidhet me një çift të njohur në TikTok. Sipas Rexhepit, bëhet fjalë për dy shqiptarë që jetojnë në diasporë dhe kanë një numër të madh ndjekësish në këtë platformë.

Ai tha se çifti është parë për dy ose tri ditë radhazi pranë ambienteve të televizionit. Megjithatë, identiteti i tyre nuk është zbuluar dhe deri tani nuk ka një konfirmim zyrtar për pjesëmarrjen në BBVK.

Ndërkohë, emra nga “Big Brother VIP Kosova” mund të shfaqen këtë sezon edhe në formatin shqiptar.

Rexhepi foli për një ish-banore të BBVK-së, e cila mund të bëhet pjesë e “Big Brother VIP Albania”, ndërsa Tozaj deklaroi se një ish-banor shqiptar i formatit në Kosovë ka marrë tashmë ftesë për BBVA.

Emri i ish-banorit nuk është bërë publik dhe mbetet e paqartë nëse ftesa do të përfundojë me një marrëveshje për pjesëmarrjen në BBVA.