Banorët denoncojnë gjendjen skandaloze të rrugës Zall Herr–Babrroi: 30 familje kalojmë çdo ditë në mes të baltës dhe gropave

Në redaksinë e Piranjat.news ka mbërritur një denoncim nga banorët e zonës së "Zall Herrit" lidhur me gjendjen alarmante të rrugës që lidh këtë zonë me Babrroin.

Sipas qytetarëve, rreth 30 familje e përdorin çdo ditë këtë segment rrugor, i cili është kthyer në një burim të vazhdueshëm problemesh dhe rreziku. Ata shprehen se rruga është e mbushur me gropa, baltë dhe dëmtime të shumta, duke e bërë thuajse të pakalueshme, veçanërisht në ditët me shi.

“30 familje kalojmë me këtë rrugë çdo ditë. Është bërë e pakalueshme. Makinat dëmtohen, fëmijët e kanë të vështirë të shkojnë në shkollë dhe askush nuk do t’ia dijë,” shprehen banorët në denoncimin e tyre.

Sipas tyre, pavarësisht ankesave të vazhdueshme, deri më tani nuk ka pasur asnjë ndërhyrje konkrete nga autoritetet përkatëse për rikonstruksionin apo mirëmbajtjen e rrugës.

Banorët kërkojnë ndërhyrje të menjëhershme nga Bashkia dhe institucionet përgjegjëse, pasi situata po ndikon drejtpërdrejt në  jetën e komunitetit./Piranjat.news