Banorët e 3 fshatrave në Kuçovë pa rrugë e urë, në dimër kalojnë mbi dërrasa

Banorët e tre fshatrave: Bardhaj, Pashtraj dhe Velagosht në ish-komunën Lumas, në bashkinë e Kuçovës, janë prej vitesh të izoluar me qendrën e ish/komunës dhe me qytetin.

Mungesa e një ure që lidh këto tre fshatra me rrugën nacionale ua ka vështirësuar jetën banorëve. Për këtë,ata duhet të kalojnë me automjetet e tyre në mes të lumit, gjë që bëhet e rrezikshme në dimër. Ndërsa  këmbësorët përdorin një urë mbi lumë, me kavo çeliku dhe dërrasa të kalbura.

Mbi këtë urë kalojnë çdo ditë edhe fëmijët e arsimit 9-vjeçar,të cilët e kanë shkollën në fshatin Lumas.

Banorët shprehen se kjo gjendje e rënduar vijon prej shumë vitesh dhe pavarësisht se janë ankuar në Bashkinë Kuçovë askush nuk ka vënë dorë për të ndërhyrë me investime në këtë zonë. Ata shprehen se rruga e fshatrave dhe ura ju është premtuar në çdo fushatë elektorale dhe ka ngelur vetëm premtim.

Banorët shprehen se kjo urë është rrezik permanent për ta dhe fëmijët,ndërkohë që- siç pohojnë vetë ata- në rastet e vdekjeve bëhet mjaft i vështirë transportimi i të ndjerit drejt varrezave të fshatit.

Fshatrat Pashtraj, Bardhaj dhe Velagosht burim kryesor ekonomik kanë bujqësinë,ndaj mungesa e urës ua vështirëson edhe dërgimin e prodhimeve në treg dhe u rrit njëkohësisht edhe kostot.