16-vjeçari Arjon Xhezairi ka ndërruar jetë në Spitalin e Traumës në Tiranë, pasi nuk arriti t’u mbijetonte plagë...
SOCIALE
Breshëri godet Dobranjin, dhjetëra fermerë pësojnë dëme në të mbjella
PiranjatPërditësimi i fundit 4 September 2026, 15:18
Një stuhi e fuqishme breshëri ka goditur fshatin Dobranj, duke shkaktuar dëme të mëdha në tokat bujqësore dhe në prodhimet e fermerëve. Për rreth 40 minuta, breshëri ka përfshirë zonën, duke dëmtuar veçanërisht parcelat me fasule.
Sipas kryeplakut të fshatit, Petrika Zyfi rreth 50 fermerë janë prekur nga pasojat e motit të keq. Në momentin e stuhisë, fasulet ishin në fazën e pjekjes, ndaj dëmet në këtë kulturë janë më të konsiderueshmet. Në shumë parcela, bishtajat janë rrëzuar në tokë, ndërsa kokrrat e dëmtuara dhe të çara nga breshëri rrezikojnë të kalben. Fermerët shprehen se një pjesë e prodhimit nuk do të mund të hidhet në treg, duke bërë që kjo gjë të sjellë humbje të ndjeshme ekonomike.
Një prej fermerëve tregon se në një sipërfaqe prej 30 dynymësh ishte parashikuar një prodhim prej rreth 100 kuintalësh fasule. Pas stuhisë, pritshmëritë për këtë sasi janë ulur ndjeshëm. Përveç fasuleve, breshëri ka dëmtuar edhe qepët, domatet dhe specat. Qepët, të cilat ishin pranë vjeljes, janë veçanërisht të rrezikuara nga kalbëzimi në ditët në vijim. Probleme janë shkaktuar edhe në pemët frutore ku janë dëmtuar rrushi, mollët dhe dardhët.
Banorët e Dobranjit thonë se zona është përballur edhe më herët me episode të ngjashme. Sipas tyre, breshëri ka goditur sërish këtë vit, ndërsa një stuhi e ngjashme kishte shkaktuar dëme edhe disa vite më parë. Përballë humbjeve të krijuara, fermerët kërkojnë ndërhyrjen e institucioneve për evidentimin e dëmeve dhe vlerësimin e pasojave. Ata kërkojnë mbështetje për të përballuar humbjet, pasi një pjesë e prodhimit të një sezoni të tërë është dëmtuar./REL
