Një grup turistësht raportohet se janë helmuar gjatë qëndrimit në ambientet e 'Premium Beach Hotel' në Golem. Ngjarja ka nd...
SOCIALE
Kempi nuk mbulon as një javë trajtim, buxheti lë sërish “jetimë” fëmijët me aftësi ndryshe
PiranjatPërditësimi i fundit 12 Dhjetor 2025, 18:46
Buxheti për vitin 2026 u miratua, por prindërit e fëmijëve me aftësi ndryshe nuk do të rreshtin së kërkuari mbështetje financiare për fëmijët e tyre.
Kempi, e vetmja ndihmë që u jep sot shteti, varion nga 8 mijë deri 15 mijë lekë në muaj. Kjo shumë nuk mbulon as terapitë e një jave shumë të nevojshme për zhvillimin e fëmijëve, e veçanërisht atyre me spektrin autik.
Nënat tregojnë se vetëm një orë terapi në ditë kushton 3500 lekë, por fëmijët me spektër kanë nevojë për terapi të llojeve të ndryshme, çka e bën të pamundur të mbulohet nga familjet e tyre.
Ato i bëjnë thirrje kryeministrit dhe ministres së Shëndetësisë të rrisë financimet për famijljet e fëmijëve me aftësi të veçanta.
Prej 20 vitesh, Brixhida Muça dhimbjen dhe sfidën i ka pjesë të pandarë të jetës. Djali i saj vuan nga spektri autik, por dhe probleme të tjera shëndetësore. Ka gjetur forcën për të hapur një qendër ditore, ku me ndihmën e donatorëve privatë siguron terapi falas edhe për fëmijë të tjerë me autizëm. Duke ua njohur dhimbjen, veçanërisht nënave që kujdesën për fëmijët me aftësi ndryshe, Brixhida ka dalë me kërkesa konkrete ndaj qeverisë.
Madje, ajo i kujton kryeministrit se Shqipëria nuk mund të jetë anëtare e Bashkimit Europian pa shërbime dinjitoze ndaj personave me aftësi ndryshe, ashtu siç ofrohen në vendet e unionit.
Ndërkohë, pak ditë më parë edhe deputetja demokrate Jorida Tabaku ka propozuar në Kuvend një nismë ligjore ku synon që t’u njihet dhe paguhet si punë kujdesi i nënave për fëmijët me aftësi të veçanta.
Por, Bixhida dhe të gjitha nënat si ajo nuk e njohin optimizmin, i tremben të ardhmes së fëmijëve të tyre kur ato të mos jenë më në jetë. Deklarata e kësaj gruaje që autizmi ka zgjedhur ta sfidojë është sa trontitëse, aq dhe ulëritëse për shoqërinë dhe shtetin: “Unë vetë them, atë ditë që do vdes, atë ditë të vdesë dhe djali im. Kujt t’ia le? Nuk dua që vajza ime të kalojë sfidat e mia dhe vështirësitë financiare. Nuk dua të jetë barrë për askënd”.
