'Kërcënim kombëtar'/ PL: Shqipëria po boshatiset, lindjet ranë 35% në një dekadë

Sekretarja për Marrëdhëniet me Publikun në Partinë e Lirisë, Znj. Arla Merja, tha se shifrat e fundit janë tronditëse: lindjet në Shqipëri kanë rënë me 35% në një dekadë, duke e çuar vendin drejt një kufiri kritik prej rreth 20 mijë lindjesh në vit.

Ajo e lidh këtë me dështimin e qeverisjes për të mbajtur të rinjtë në vend dhe me politikat që kanë varfëruar familjet shqiptare.

“Shqipëria po boshatiset,” tha Znj. Merja. “Të rinjtë ikin sepse nuk mund të jetojnë me dinjitet këtu; pas largimit, krijojnë familje jashtë vendit. Kjo është prova më e qartë e dështimit. Qeveria hesht dhe propagandon, ndërsa vendi humbet rininë, ekonominë dhe të ardhmen.”

Ajo kërkoi llogaridhënie dhe ndryshim real: paga që përballon jetesën, mbështetje reale për familjet e reja dhe politika që i motivojnë qytetarët të qëndrojnë, për të ndaluar zbrazjen e vendit dhe për të siguruar të ardhmen e tij.

Arla Merja: Të nderuar qytetarë!

Shifrat e fundit nuk janë më thjesht statistika, janë tronditëse dhe nuk lënë më vend për justifikime. 

Janë aktakuzë.

Në vetëm një dekadë, lindjet në Shqipëri kanë rënë me 35%.

Po afrohemi me shpejtësi drejt një kufiri kritik, rreth 20 mijë lindje në vit.

Kjo nuk është rastësi, por është pasojë.

Pasojë e një qeverisjeje që ka dështuar të mbajë të rinjtë në këtë vend.

Pasojë e politikave që kanë varfëruar familjen shqiptare dhe kanë vrarë çdo shpresë për të ardhmen.

Sot nuk kemi thjesht një krizë lindjesh.

Kemi një Shqipëri që po boshatiset.

Të rinjtë po largohen çdo ditë.

Po ikin ata që duhet të ndërtojnë familje, të lindin fëmijë dhe të mbajnë gjallë këtë vend.

Dhe mos gabohemi, kjo nuk është një zgjedhje e lirë.

Kjo është një arratisje nga pamundësia për të jetuar me dinjitet në vendin e tyre.

Sepse këtu pagat nuk mjaftojnë.

Sepse këtu çmimet rriten pa kontroll.

Sepse këtu shteti nuk mbështet, por rëndon mbi qytetarin.

Dhe ironia më e hidhur është kjo:

Të rinjtë shqiptarë, sapo largohen, krijojnë familje.

Lindin fëmijë.

Ndërtojnë jetë, por jo më në Shqipëri.

Kjo është prova më e qartë e dështimit.

Ndërkohë, vendi futet në një spirale të rrezikshme:

Sa më shumë të rinj largohen, aq më pak lindje ka.

Sa më pak lindje, aq më shpejt plaket dhe shuhet ky vend.

Dhe qeveria?

Hesht.

Justifikohet.

Propagandon, ndërkohë që Shqipëria zbrazet.

Ky nuk është më problem social, por një kërcënim kombëtar.

Një vend që humbet rininë e tij, humbet gjithçka: ekonominë, arsimin, fuqinë punëtore dhe mbi të gjitha  humbet të ardhmen.

Prandaj sot nuk mjaftojnë fjalët.

Duhet llogaridhënie.

Duhet ndryshim real.

Sepse Shqipëria nuk ka nevojë për propagandë, por për politika që mbajnë të rinjtë në vend.

Për paga që përballojnë jetesën.

Për mbështetje reale për familjet e reja.

Për një shtet që i jep arsye qytetarëve të qëndrojnë.

Sepse sot pyetja nuk është më:

“Sa po zhvillohemi?”

Pyetja është:

Kush do të mbetet këtu për ta ndërtuar këtë vend nesër?

Dhe nëse nuk veprojmë sot , nesër mund të jetë shumë vonë.