Në fjalën e saj në Kuvend Ina Zhupa ka mbajtur një qëndrim të ashpër ndaj qeverisë Rama.
Zhupa theksoi se ësht&e...
SOCIALE
Mbi 30 mijë familje me ndihmë ekonomike nuk përfitojnë subvencion për pagesën e dritave
PiranjatPërditësimi i fundit 13 Prill 2026, 16:30
Vetëm një në tre familje që marrin ndihmë ekonomike po përfiton edhe subvencionin për energjinë elektrike, duke nxjerrë në pah një boshllëk të madh mes skemës së mbrojtjes sociale dhe realitetit të tregut të banesave me qira në Shqipëri. Sipas Raportit Vjetor 2025 të Shërbimit Social Shtetëror, 15,366 familje, ose 33% e totalit të familjeve në skemën e ndihmës ekonomike, morën kompensimin e energjisë elektrike gjatë vitit të kaluar.
Vetë institucioni pranon se niveli i ulët i përfitimit nuk lidhet domosdoshmërisht me mungesën e nevojës, por me pengesa dokumentare që burojnë kryesisht nga mënyra si jetojnë familjet vulnerabël. Problemi më i madh mbetet strehimi me qira, ku kontrata e energjisë shpesh nuk është në emër të familjes që banon në apartament, por të pronarit, ose mungon krejtësisht një marrëdhënie e formalizuar me OSHEE.
Raporti evidenton se jashtë skemës mbeten veçanërisht familjet që jetojnë në banesa me më shumë se një kurorë familjare, një fenomen i zakonshëm si në zonat urbane me qira të larta, ashtu edhe në familjet e zgjeruara. Në këto raste, kontrata e energjisë është në emrin e kryefamiljarit të parë, ndërsa familjet e tjera, edhe pse në nevojë, nuk arrijnë të provojnë ligjërisht të drejtën për subvencion.
“Numri i familjeve përfituese të subvencionit të EE në raport me numrin e familjeve përfituese është i ulët për shkak të mungesës së dokumentacionit që kërkohet në legjislacion, si kontrata me OSHE për familjet që jetojnë me qira dhe për ato raste kur kontrata nuk është në emrin e kryefamiljarit dhe aty jetojnë më shumë se një kurorë në një banesë si dhe në shumë familje kanë anëtarë që përfitojnë kompensimin e EE nga skema e pensioneve apo dhe si PAK.”- thuhet në raport.
Këto të dhëna dëshmojnë mënyrën se si kriza e strehimit dhe informaliteti i tregut të qirasë po fillojnë të prodhojnë kosto të drejtpërdrejta sociale. Në praktikë, familjet më të varfra jo vetëm që përballen me barrën e qirasë, por humbasin edhe aksesin te një mbështetje bazike si kompensimi i faturës së energjisë, pikërisht për shkak të mungesës së kontratave të formalizuara./ Monitor
