Shembet rruga që lidh tre fshatra në Delvinë, bashkia s’ka kapacitete të ndërhyjë

Banorët e fshatrave Vllahat, Kostar dhe Pralat në bashkinë e Delvinës janë të izoluar prej më shumë se 10 ditësh pasi rrëshqitja e dherave ka nxjerrë jashtë funksioni rrugën që i lidh ata me qytetin.

Banorët detyrohen të transportojnë në krah produktet ushqimore dhe prodhimet e tyre bujqësore. “Pothuajse vajtën 10 15 ditë që kur ranë ato shirat e mëdha na është shembur rruga. Jemi të bllokuar, kemi pleq të sëmurë, na duhet rruga, na duhet me patjetër”, thotë një banor.

“Kalojmë gjërat me krah këtej, janë dy tre fshatra që janë të izoluara nga kjo punë e kësaj rruge”, thotë një tjetër.

“Kanë ardhur edhe këta të bashkisë edhe këtu akoma s'kanë ndërhyrë akoma dhe kërkojmë ndihmë që të na rregullohet rruga”, thotë një banore.

Zyrtarë të bashkisë së Delvinës janë shprehur se kanë lajmëruar prefekturën e Vlorës për ndihmë, pasi me kapacitetet dhe mundësitë financiare të bashkisë nuk kanë mundësi të riparojnë rrugën e shembur.