24 orë kaos në Botëror: Përplasja e Messit, krisja te Anglia dhe një trajner jashtë

Botërori 2026 vazhdon të prodhojë jo vetëm emocione në fushë, por edhe polemika jashtë saj. Sipas raportimeve të mediave britanike, 24 orët e fundit janë shoqëruar me tensione në kampin e Anglisë, debat për gjykimin, reagimin e Lionel Messit ndaj arbitrit dhe shkarkimin e trajnerit të Senegalit.

Një nga temat më të diskutuara ka qenë raporti mes trajnerit të Anglisë, Thomas Tuchel, dhe yllit Jude Bellingham. Pas fitores 2-1 ndaj Norvegjisë, Tuchel e cilësoi paraqitjen e skuadrës si "me fat", ndërsa Bellingham reagoi duke mbrojtur bashkëlojtarët. Megjithatë, kapiteni Harry Kane ka minimizuar zërat për një përçarje, duke theksuar se trajneri thjesht kërkon standarde më të larta.

Ndërkohë, Lionel Messi është bërë protagonist i një momenti të tensionuar gjatë fitores 3-1 të Argjentinës ndaj Zvicrës. Sipas Daily Star, kapiteni argjentinas i është drejtuar arbitrit portugez Joao Pedro Pinheiro duke i kërkuar të tregojë më shumë respekt gjatë komunikimit me të.

Polemikat nuk kanë munguar as jashtë fushës. FIFA po përballet me kritika pas disa vendimeve të diskutueshme të arbitrave dhe VAR-it gjatë këtij Botërori, ndërsa disa episode kanë ndezur debat mes tifozëve dhe analistëve.

Në anën tjetër, Federata e Futbollit e Senegalit ka shkarkuar trajnerin Pape Thiaw pas eliminimit të kombëtares nga Belgjika në fazën e 1/16-ve, pavarësisht avantazhit 2-0 që skuadra kishte gjatë ndeshjes.

Gjithashtu, partnerja e sulmuesit norvegjez Alexander Sorloth ka dënuar publikisht fushatën e ofendimeve në rrjetet sociale ndaj futbollistit, i cili u kritikua ashpër pas eliminimit të Norvegjisë nga Anglia./Përktheu Piranjat News